Vechita 25 buba CWA Wrestling champion kümogo

Phek District kübok Pfutsero sports complex nung ayongba 25 buba CWA melangteptsü asayamong nung Vechita Khesoh (Tesülen, Abelen nungi 6 buba)-i temaba jenjang ngua champion aküm. (Phek, February 19)
Phek District kübok Pfutsero sports complex nung ayongba 25 buba CWA melangteptsü asayamong nung Vechita Khesoh (Tesülen, Abelen nungi 6 buba)-i temaba jenjang ngua champion aküm. (Phek, February 19)

Dimapur, February 19 (TYO): Nagaland kübok Phek nung ayongba 25 buba Chazouba range Wrestling Association (CWA) asayamong nung Vechita Khesoh-i temaba jenjang ngua champion kümogo.
Arishi küm 30 tain Vechita-i senpet sen 1,50,000 agizük; tanabuba jenjang angur, arishi küm 20 tain Venüzo Dawhuo-i senpet sen 1,10,000, arishi küm 20 tain Vekutho Soho-i tasembuba jenjang ngua senpet sen 80,000 aser Kuku-o Getsa-i pezübuba jenjang ajangzüka senpet sen 50,000 agizüka liasü.
“CWA asayamong küm 25 tashi takok tulu ngua ayongba atema tayonger nem tetushi agütsür. Asayartemia tajungtiba agüja shilem agiba ajanga pei Chakhesang kin dang masü saka Nagaland ajunga nem konang nüngsang bener arutsütsü ajungshir,” ta Nagaland Parliamentary Secretary, Planning & Coordination, Evaluation & Monitoring Cell & Taxes, Neiba Kronu-i asayamong lapokba sentong nung metetdaktsü.
Asayartemi toktepa asayaba jakdang tongti tesemdangeri CWA küm 25 ajungba nüngshilong aser nüngo na sayaja liasü.

You must be logged in to post a comment Login