Vechulou Kanuo nem CII Women Exemplar Award agütsü

Dimapur, Rongchii 10 (TYO): Chakhesang Baptist Church Council (CBCC) kübok NGO, Chakhesang Women Welfare Society (CWWS) indang Executive Director, Vechulou Kanuo nem India Tatong Tir, M Venkaiah Naidu-i CII Woman Exemplar 2018 sempet agütsü.
Rongchii (April) 8 nü New Delhi nung sempet agütsüba sentong ka ayongzükba nung Health, Education aser Micro Enterprise amala nungi grass-root level nung tetsür lenirtem nem totushi agütsü. Micro Enterprise telemsa nungi Vechulou-i iba sempet agizükba ya Nagaland aser North East nungi mezüngbuba lir, koba ajanga kija aser wadang balala nung tetsükdaktsü melie takok angutsü asoshi ajungshia totushi agütsüba lir.
Vechulou-i 2000 nung CWWS indang Secretary mapa agizük aser iba mapang iba telok ya sentsüh nung liasü aser Phek District kübok yimtsüngtem nungi tetsür taküm aika melenshitsüsa iba telok ya lai anir aru. Vechulou-i tetsür ka ama lokti balala nungi tetsürtem taküm jenjang ajungkettsü, tetsür temeden aser rongsenketsüng tajungba kümdaktsütsü asoshi inyak. Küm 20 shi Vechulou indang mapa ajanga tetsür, aluyimer aser lanur 10,586 nem tanü tendak aluyimba aser shiruru metsüba yimyatem ajungkettsü aser Nagaland nung aliba yimtsüng aika nung nisung meyirijang aika small entrepreneurs kümdaktsü.
Kasa sentong nung Education tsütsü nungi Munni Begam aser Health tsütsü nungi Asha nem kasa sempet agütsü.
Iba sempet ya CII Foundation Woman Exemplar Program (WEP) indang shilem ka lir aser iba ajanga yimdak yimtsüng jenjang nung tetsürtem temeden aser pei sasa pei taküm liyonga aotsü asoshi tesayuba balala agüja pei aliba tesem nung temelenshi tajung bener aruba nung temulung agütsür.
Iba sentong ya 2005 nung tenzükba sülen tetsür 41 jangjateta teyari agütsüogo.
Iba sempet agütsütsü asoshi industry aser social sector nungi tejangja nisungtemi shimer. Linük nung NGO balala nungi iba sempet asoshi nomination 225 dak tali agüja liasü. Iba sempet ya agütsü tenzüker küm 14 jungogo aser Health category nung JK Tyres aser Micro-Enterprise category nung JCB India ajanga yarir.