Vedic & Mughal nunger mapang nungi nashi kümzüka ayu : Rajnath Singh

New Delhi, November 6 (Agencies) : Mughal nunger yimsüsüba mapang nungi nashi kümzüka ayu, ta Home Minister, Rajnath Singh-i Deobarnü metetdaktsü.
“Nashi tepsetba aser nashishi ‘vedic’ mapang nungi nokdanga liasü. Mughal yimsüsüba mapang, Bahadurshah Zafar, Akbar aser Jehangir nungeri yimsü asüdangbo nashi tepsetba nokdanga liasü. Nashi tepsetba menokdang tashi Hindustan madak yimsü mesütettsü ta ‘Babarnama’ nunga zülua lir” ta tanü Rajnath-i ashi.
State aika nung nashi tepsetba nokdangogo saka iba dak sendakba onük ya state tem nem angatetdaktsütsüla, ta Home Minister-isa shisem.
“Nashi indang onük ya sobaliba indang tebilemtsü ka masü saka iba ya tamangba yimsü indang tebilemtsü ka lir. Tamangba yimsü indang onük ka süaka, iba ya rongsenren, putiotsü aser scientific tangatetbatem nunga shisadangtsüla” ta paisa metetdaktsü.
Bangladesh-i ozüng alema kiset shirurutem shibelenba khenyongi nokdangtsü atema NDA sorkari mapa inyakdar aser iba asoshi teinyaktsü aika inyakogo saka arrtsü ulura aliba ajanga takok junga monguteti lir, ta Rajnath-i ashi.
“Ozü sorkari nashi kümzüka yunür aser Bangladesh-i nashi miima bener aoba nokdangtsü atema onoki meranger” ta paisa metetdaktsü.
November 7, 1966 nü Delhi nung nashi tepsetba inyakyim anema lungkak aitdang asürtem nem Rajnath-isa tetushi agütsü.
“Parnoki alizüng tulu ka atema taküm bendanga agütsü ta ni amanger. Ni parnok nem tetushi agütsür aser küm 50 süaika nenoki (sentong ayongertem) parnok bilemtetba atema, nenok nema tenüngsang agütsür” ta paisa shisem.
Iba sentong nung RSS general secretary, Bhayyaji Joshi-ia, “nashi kümzüka ayuba maparen ya mapang talangka inyaka arur aser tang sorkar aliba nung Home Minister-i nashi kümzükertem den dena lir aser parnok nem tetushi agütsür” ta ashi.