Venezuela election: Opposition teloki temaba jenjang angur

Caracas, December 08 (Agencies): Venezuela opposition teloki tan agiba election nung linük yimsüsütsü tashi abenba Socialist yimtenren telok den temaba jenjang anguba osang ka Venezuela’er election ketdangsertemi metetdaktsüogo.
Tan agiba National Assembly election nung opposition teloki tanü tashi nung National Assembly menden 167 nungi menden 110 tashi ngua menden 55 dang anguba Socialist telok den temaba jenjang ngua lir ta parnoki ashi.
Parnokisa ashiba agi, National Assembly menden ana nung takok angur mejangjateti lir saka iba menden anajia ajangzükra, opposition teloki National Assembly menden shilem 3 nung shilem 2 tashi angur akümtsü.
Yamaji atalokra, opposition teloki Supreme Court nung obendanger obendangtsü menden nungi anentsütsü, linük Tir yimsüsü menden nung anentsütsü maparen tenzüktettsü aser linük temzüng tanaben yanglushitsü tashi angutsü ta parnoki shisem.
Opposition teloki tan menden anaji mongutetaka, par teloki taoba küm 16 tejaklen nungi tenzüka Venezuela madak yimsü asüba Socialist telok madak tan ayong ayonga takok angur asütsü.
Ano külen, Socialist sorkari tashiyim agi tepuokdak puoka ayurtem chioktsü tenangzükba olen ka opposition telok lenirtemia yashi Hombar nü metetdaktsüogo.