Venezuela: Opposition-i par takhangba atalokdaktsütsü atema mapang latettsür

Caracas, November 04 (Agencies): Venezuela Tir, Nicolas Maduro anemer opposition teloki par takhangba asangsang nung atalokdaktsütsü atema Maduro nem tan November ita 11 nü tashi mapang agütsüogo.
Maduro-i par Venezuela nung election agitsü mapang latettsü aser yimtenren ken o nung ajemdaker tepuokdak puoka ayurtem chioktsü takhangba asangsang nung atalokdaktsütsü mapang agütsü saka Vatican-i ayonga Venezuela sorkar aser opposition telok na tsüngda angatetteptsü mapatong anemer kaketshirtemi maneni longkak aittsü sentong ayonga agia liasü.
Maduro-i aniba Venezuela sorkari opposition teloki Maduro Tir menden nungi anentsütsü atema par linük ajunga nung nüburtem nungi vote agitsü ayongba sentong nokdangba sülen Venezuela nübur meyirijang aikati par linük yimti balala nung Maduro aser pai aniba sorkar anema longkak aittsü tenzüka liasü.
Ajisüaka, alima ajunga nung Catholic tamangba yimsü benshir lenisang, Pope Francis-i ayongba sülen Venezuela sorkar aser opposition telok na tsüngda mangatettep ken o angatetteptsü atema senden takok ngua mendaktsütsü nükjidong nung opposition teloki par longkak aittsü sentong tang anena lir.
Tang longkak aittsü maparen anen aka, Maduro-i tan November ita 11 nü tashi nung par takhangba asangsang nung matalokdaktsüra, parnoki maneni longkak aittsü sentong balala ayonga agitsü renemba olen ka opposition teloki metetdaktsüogo.
Venezuela Tir election 2018 küm tatemlen agitsü asoshi mezüngbo renem saka election agitsü mapangji atsükzüka, 2017 küm tetenzüklen ayonga agitsü asoshi opposition teloki takhangba benoka lir.
“Ozü tanabuba takhangbaji Venezuela sorkari yimtenren ken nung ajemdaker tepuokdak puoka ayurtem tekaratiba mapang nung chioktsü takhangba lir,” ta opposition telok lenir, Carlos Ocariz-i osang jangjashitsü.
Supreme Court-i opposition telok nungi yimsüsür timba züngsemba National Assembly loksaja lir saka okadak tetuyuba ajangdanga inyaka, national council tasen ka tentettsü takhangba opposition teloki benokba osang angazükogo.
Taoba Venezuela lenisang, asür Hugo Chavez melenzüka, arishi küm 53 tain Maduro-i 2013 küm nungi tenzüka, Venezuela lenisütsü menden abentsü tenzük saka pai opposition teloki tan benokba takhangbaji agizüktsü asü magizüktsü iba osang kecha memetetdaktsüi lir.