Venezuela opposition lenisang, Lopez tepuokdak küm 14 puoker

Tepuokdak puoka aliba opposition lenisang, Leopoldo Lopez pusemertemi Venezuela kübok Caracas yimti nung tentetba okadak kimalen senteper ola tulu adoka sorkar anema longkak aitba noksa nung angur. (Caracas, September 11)

 Caracas, September 11 (Agencies): Tepuokdak puoka aliba Venezuela opposition lenisang, Leopoldo Lopez nem tepuokdak küm 14 tashi puoka ayutsü temerenshi tanü Hokolbar nü agütsüogo.

Opposition teloki ayonger yaküm 2014 küm longkak aitdang longkak aiter o police na tsüngda raratepa nisung 10 dak tema asüba osang bushiteta lir.

Aji oda, iba longkak aittsü sentong nung osettsüset raksatsüba aser ozüng alema inyakba ken o nung ajemdaker aitsüba sülen okadaki Lopez nem tanü iba obendangji agütsür lir.

“Venezuela Tir, Nicolas Maduro yimsüsüba menden nungi tashiyim agi atsüngdoktsü merangba aser pai aniba sorkar anema tashiyim amshia longkak aitba ken o nung aitsüba sülen Lopez nem küm 13 ser ita 9 tashi tepuokdak puoka ayutsü temerenshi agütsüogo,” ta Tir office-ia osang jangjashitsü.

Ajisüaka, Venezuela-i tan Lopez merenshiba ajanga par linüki ozüng alema inyakba kuli sayur ta alima ajunga nung nübur temeten asoshi nokdakba tongti telok, Amnesty International-i metetdaktsüogo.

“Lopez indang aibelenbaren kijaji pai opposition lenisang menden benokbaji lir. Venezuela-i Lopez merenshiba ajanga par linüki nübur nem agüja aliba temeten anema inyakba den külemi, tarutsü mapang nunga iba amala tashiyim maparen sadoka inyaktsü lenmang lapoka ayur lir,” ta Amnesty International Americas Director, Erika Guevara-Rosas-i kanga mepelai ashi.

Arishi küm 44 tain Lopez ya par Venezuela nung tentetba tongti Popular Will yimtenren telok tentetsang lir.