Venezuela sorkari Migration Force ka tentetogo

Mongputeni/October 6, 2018 (Agencies): Linük nung yimden yimsüsüba aser rongsen ketsüng nung timtem aliba ajanga nüburtem linük toktsür aoba nokdangtsü asoshi Venezuela sorkari border controls tali tashi itshitsütsü asoshi police force tasen ka tentetba sangdongogo.
Rogonü Vice President Delcy Rodriguez-i ashiba agi, Migration Force tasenba yagi Venezuela-i aitba aser tuguba point 72 azüoktsü.
Laisa, iba specialised force ajanga tang aliba port, airport aser border crossing tem nung teyari agütsütsü, ta ashi.
Iba force tasen tentetba ya migration asadangtsüba atema lir, ta lai ashiba den bendenloksema iba ajanga Washington-i alima nem teyazü osang agütsütsü merangba masü saka ochiji adoktsü.
Mapang ka nungbo Venezuela ya Latin America nung takartiba linük ka liasü saka 2014 küm nungi totzü jenjang ajema akümba ajanga linük dak kanga mejungi kongshiogo aser iba den bendenloksema tir Nicolas Maduro yimsüsüba kübok rongsenketsüng jenjang tamajungba kümogo
United Nations sangdong ka ajanga ashiba agi, 2015 küm nungi tang tashi nung Venezuela nunger million ka dak tali linük toktsürogo aser parnok timbaka Colombia-iogo.
Venezuela nunger aika Colombia-i senoka aitba ajanga linük yimtiba Bogota kübok tesem kar nung parnok jenokdaktsütsü asoshi khen atema süki süzüka liasü.
Iba mepetmesü ajanga Brazil, Peru, Ecuador aser America linük aika kongshiogo.