Venkaiah Naidu 13buba India tatong Tir shimogo

New Delhi, August 05 (Agencies): Honibarnü BJP lenir tain aser NDA candidate, Venkaiah Naidu-i tatong Tir election nung takok nuga India nung 13buba Tatong Tir shimogo.
Parliament House anaprong nungi züngsemtemi vote agütsüba nungi Naidu-i vote 516 angu aser Congress-i aniba opposition candidate aser taoba mapang West Bengal Angh, Gopalkrishna Gandhi-i vote 244 angu.
Iba election nung vote shilem 100 tera agi dang majung agütsü. House ana senteper vote züngsem 785 nungi züngsem 771-i vote agütsü, aser iba shilemji 98.21 asütsü.
Iba election nung takok anguba sülen Naidu-i, Rajya Sabha nung Chairman ka ama pai tetsübu meli züngsem ajak den amalitepa inyaktsü, ta metetdaktsü.
“Rajya Sabha Chairman ka ama züngsemtem teyaritep ajanga House akhümket ayutsü aser senden ozüngtem nung ajemdaker inyaktsü,” ta pai metetdaktsü.
Paisa, “Linük nung tongtiba tebilemtsü onüktem atema Rajya Sabha züngsem ajaki tajungtiba agi shilem agitettsü asoshi ni inyaktsü,” ta ashi.
August 10 nü Naidu-i tatong Tir Hamid Ansari melenzüktsü.
Tanü iba election nung Ato kilonser, Narendra Modi, cabinet züngsemtem aser Congress Tir, Sonia Gandhi aser Rahul Gandhi nunger densema opposition lenirtemia vote agütsü.
Parliament House kima osangbenertem den jembidang Assistant Returning Officer, Mukul Pandey-i, tanep 10:00 ako nungi tenzüka vote agütsü aser nikongdang 5:00 ako nung tembang, iba sülen 6:00 ako nungi vote azüngtsü tenzük, ta metetdaktsü.
Tanep Naidu vote agütsüi aodang pa den Parliamentary Affairs Minister, Ananth Kumar den BJP lenirtemi pa meina ao.
(Maneni tapak 11 nung…)