Venus-i Indian Wells nung tanaben shilem agitsü lemteter

Los Angeles, March 02 (Agencies): Taruba hopta nungi tenzüka Indian Wells nung asayatsü ayongba BNP Paribas Open tennis asayamong nung shilem agitsü telemtetba ka America tsür, Venus Williams-i aigogo.
Tenü, Serena Williams sülen anidaka, Venus-i küm 15 tejaklen tenzükba longkak aitsüren anena Indian Wells asayamong nung tanaben toktepa shilem agitsü lemteter lir.
Serena-ia küm ishika longkak aita aliba sülen yaküm, 2015 küm nungi tenzüka Indian Wells asayamong nung tanaben toktepa shilem agitsü tenzüka lir.
2001 küm ayongba India Wells asayamong nung Venus temokok yirua Serena den asayatsü lemzükba semifinal nung masayatettsüsa akümba sülen asaya repranger telok kari tena sensatsüba yong Serena o Venus nati longkak aita 2002 küm nungi tenzüka iba asayamong nung shilem magi aru.
“Ni tesüiba mapang indang bilemtetdang temulung shiranga bilemer. Ajisüaka, asaya reprangertemi tetenzükba asaya asayaba jakdang second 57 tashi agia kenü, Serena nem aküm agüja la pela agizükba ngua, tesüiba mapang ajurushiba mangatettep ajunga agiener Indian Wells asayamong nung tanaben shilem agitsü asoshi ni lemtetogo,” ta arishi küm 35 tain Venus-i osang jangjashitsü.