Veracious, Gariphema, Nagaland Police & Chedema FC nungeri takok angu

Kohima, September 27 (TYO): Tang Kohima nung tasayadak 17 buba NSF Martyrs’ Memorial Football Tournament anogo 3 buba nung Veracious Football Club Zapami village, Gariphema Village Youth organisation, Nagaland Police (Red) aser Chedema Football Club teloktemi takok ngua tanü, Mongolbar  nü shilem agiogo.

Tanü mezüngbuba asaya nung Veracious teloki goal 2-1 agi Blaze Boys FC Jotsoma telok tsükdaktsü.

Tanü asaya tenzüker minute 25 buba nung Senowe-i goal 1 agüja par Veracious telok temaba jenjang nung ajungkettsü saka Blaze asayar, Tewe Kreo-i minute 62 buba nung goal 1 agüja par telok anaprongla kasa jenjang kümdaktsü.

Tesülen, Senowe-isa asaya tembangtsü mapang nung goal agütsüba ajanga par Veracious teloki goal 2-1 agi takok ngua liasü.

Tanabuba asaya nung atazüktsüba asaya mapang tembang tashi nung goal ka danga magütsüteti draw jenjang anguba yong takoker shimtsü atema tie-breaker metsütep aser Gariphema teloki goal 5-3 agi Froster’s FC madak takok angu.

Tasembuba asaya nung taoba champions, Nagaland Police teloki goal 11-0 agi Wiggle FC telok ajemshia akokba sülen otsü tasen yanglua liasü.

Tanü asaya nung Police asayar, Ratobe aser Kekhrie nati hat-trick yanglua, tan asayamong nung hat-trick yanglur mezüng asayar küma otsü yanglu.

Tanü asaya tenzüker minute 2 ser second 35 nung Atun-i 1 buba goal agütsüba sülen Ratobe-i minute 4, 39 aser 44 buba nung goal 3 tashi agüja hat-trick yanglua kanga junga asaya.

Külem asayar, Kekhrie-ia minute 16, 58 aser 60 buba nung hat-trick yangluba den külemi, Limakumzuk, Lipok aser T. Meren nungeri minute 31, 38 aser 39 buba nung goal kaka agüja liasü.

Tesülen, asaya tenzüker minute 61 buba nung Atun-isa 11 buba aser takokba goal agüja par Police telok nem takok ngudaktsü.

Khriesavizo-i minute 57 buba nung takokba goal agütsüba ajanga par Chedema teloki goal 1-0 agi MT Youth Club telok madak tatembangba aser 4 buba asaya akok.

September 28 nü asaya yamai alitsü:

1.      Hawothia FC vs Forest Colony @9:30am
2. Nagabazar YO vs XII Tribes United  FC @ 11am
3.      Tyrants FC Khuzama vs Peraciezie Royals @12:30pm
4. Striking X, Zhadima vs Country Boys Peren @2pm