Veterinary Day nüngtem nung Dog Show ka kaogo

April 29, 2017 nü Capital Convention Centre, Secretariat Plaza, Kohima nung World Veterinary Day anogomung nüngtem nung ayongba, dog show sentong nung MLA, Dr. Niekiesalie Nicky Kire-i jembiba noksa nung agur. (Kohima, April 29, 2017).

Kohima, April 29 (TYO): April 29, 2017 nü Capital Convention Centre, Secretariat Plaza, Kohima nung World Veterinary Day anogomung nüngtem nung dog show ka kaogo aser iba sentong nung tongti tesemdangerji MLA, Dr. Niekiesalie Nicky Kire liasü.
Iba sentong nung jembidang Dr. Nicky Kire-i, “Naga nunger loktii tajungtiba dang meimer aser tasen-tasen sapur, iba den külemi azü tapu balala metsür Naga nunger aika lir, ta metetdaktsü.
Pai ashiba agi, ano azü jenjang tasak alirtema lir, saka azütemji anepalu masür.
“Azü ka kibur akumbaji tatembang masü, saka iba sülen asenoki koma anepalur, ibaji tongtibang. Azüji nisung tembar tajungtiba aser dog show nung parnok züi shilem agiba ngur kiburtem pelatsü,” ta paisa ashi.
Okila jembidang College of Veterinary Science & Animal Husbandry CAU Jalukie Dean, Dr. Captain G.D.J Rao-i, nisung ajaki azü aginer, saka ajaki anepalutettsü asü, ta ashi.
Paisa, azütem tazüokba nung anitettsü atema training agütsütsüla, iba den külemi mapang shia vaccine agütsütsüla, kei-mozü agütsütsüla aser temang tendangtsütsüla, ta ashi.
Iba sentong ya NSVC Tir, Dr. I.P. Khala leniba nung agi aser sentong nungsa Dog squad, DEF, Kohima-i shilem agia liasü.
Dog show ya telemsa ana- Mixed Breed aser Pure Breed nung tendanga liasü. Iba tetoktepba nung azü Pure Breeds 10 aser Mixed Breeds 5-i shilem agi.
Pure Breed takokertem nem certificates den senpet sen 10000, 7000 aser 5000 agütsü aser Mixed Breed category nung takokertem nem certificates den senpet 7000, 5000 aser 3000 agütsü.
Dog Show nung tetendangertemji- Dr. Doreen Peseyie (Tongti tetendanger), Dr. Michael Imti Imchen aser Dr. Sungkum Jamir nunger liasü.

Pure Breed takokertem:
1st – Gifty (Cocker Spaniel) kibur- Meren Walling
1st Runners up-Midnight (Dalmatian) kibur- Limatila
2nd Runners up- Shiro (German Shepherd) kibur- Angulie
Mixed Breed takokertem:
1st – Hunter kibur- Adizo Khezhie
1st Runners up- Tiny kibur- Apokla
2nd Runners up- Browny kibur- Aneipele Dianee