VHP-i International President shim; Pravin Togadia shimdok

New Delhi, Rongchii (April) 14 (Agencies): Vishwa Hindu Parishad-i küm 52 sülen mezüng secret ballot agiba indang osang temai adokogo aser iba nung Justice VS Kokje-i Raghava Reddy dang nungi votes teimba angu.
VHP indang international president shimtsübaji yaküm Bhubaneswar nung Luchii (December) ita nungi tenzük saka obang meputep adokba ajanga iba maparen tom nung anena liasü.
Kokje-i takok anguba sülen par telok indang osang metetdaktsüba nung Pravin Togadia densema maliasü.
Election result nung temulung masüba agi Togadia-i Rongchii (April) 16 nungi mapang telatet makai lumia lungkak aittsü ta telemtetba agi.
Kokje-i shimba telok nung Alok Kumar advocate (Working President); Ashok Chowgule (International Working President); Milind Parande (General Secretary); Vinayak Rao Deshpande (Joint General Secretary) nungertem dena lir.
VHP indang international president shimba election nung vote ajak agi 192 agütsü. Iba nungi ka magizükba dak alaka Kokje-i votes 131 aser Reddy-i votes 60 angu.
Tir menden atema nübo ana lir anungji elections agitsü ta züngsem 273 agi akümba Board of Trustees-i telemtetba agia liasü.
Hindutva politics asoshi tamaitsü tejak ta züngshiba Pravin Togadia madenba atema osangbeneri asüngdangdang VHP joint genral secretary Surendra Jain-i “Hindu loktilibaji onok indang tamaitsü tejak ashi tanga shinga mali. Mapa nung onoki shilem balala agir saka nisung shinga dak-a memetaloker” ta langzü.
“Kokje’er cabinet nung pa madenba atema Togadia jashir saka VHP ya külen tsütsüi aoba lenmang ka lir. Na khen aitra, toktsür aotsü makok. Hindu loktiliba tenzükba wadang nung onok külemi inyaktsü. Onoki nübortem aginüba ama inyaktsü aser Ram Mandir yanglutsü atema mapa inyaktsü. Mandir-ji idakjisa yanglutsü, tang iba kimung onok ket nung mali saka ibaji melenshitsü. VHP züngsemtemi aginüba ama Ayodhya nung Babri ta asüba tenüng nung masjid ka danga meyangludaktsütsü” ta Jain-isa metetdaktsü.
VHP tir atema elections agitsü anogo ka lia RK Puram nung alib VHP headquarters-i karyakarta ka maitdaktsüba ajanga Kokje aser Reddy teloktem tsüngda mangatettep adok.