VHP-i Jharkhand nung nashi tepsetba nokdangtsü akhanger

Ranchi, September 27 (Agencies): Deobar nü Vishwa Hindu Parisad (VHP)-i, Jharkhand nung BJP-i aniba sorkari nashi tepsetba ozüng junga mebenshiteter ta aija state nung nashi tepsetba nokdangtsü atema takhangba agütsüogo.
Hokolbar aonung Ranchi, Doranda kiyong nung aliba Hindu nunger tekülem ki ka nung nashi shi anguba sülen yashi (Honibar) Hindu aser Muslim na tsüngda rara adoka liasü, iba rara nung nisung ana injang agi yiruogo.
Tanep osangbenertem den jembidang Jharkhand VHP tongti Pramod Mishra-i, “State nung nashi shi nokdangtsü onoki akhanger. 2005 küm nashi tepsetba nokdangba mapang tang Chief Minister teinyaktak, Raghubar Das minister inyaka liasü. Tangbo iba ozüng benoktsü atema Das-i mera magir,” ta ashi.
VHP lenirisa, “State nung nashi tepsetba nokdangtsü atema mera takhang agitsü state sorkar dang tuyuang, ta onoki India Tir, Ato kilonser, Angh aser tangar ketdangsertem dangi shidi zülutsü,” ta ashi.
“Nashi tepsetertem aputsü aser parnok anema ken o akatsüla onoki special task force aser special court dang akhanger,” ta Mishra-i ashi.
Paisa, “Nashi tepsetba tesemtem mita reprangtsü asoshi atema mera agia mali,” ta shisem. Yakünü tekülem kidang nashi shi anguba nungi tamangba lokti ana tsüngda rara nung nisung kar yiruogo. Tesem aika nung garitsüng ronga lungkak aita liasü.
Rara adokba ajanga school ketdangsertemi tsüraburtem dang pei tanurtem ani-i arutsü metetdakja liasü.
Iba sülen police-i tensa azüoktet aser Ranchi ketdangsertemi tetuyuba kar agüja liasü.