VHP-i ‘Ram Mahotsav’ ta ser Ayodhya Temple sentong ka tenzüktsü

New Delhi, March 21 (Agencies) : Ram Temple yanglutsü takhangba agüja tenzükdang nungi tongti shilem agir Vishwa Hindu Parishad (VHP)-i maneni iba takhangba sentong tenzükshitsü telemtetba agiogo.
Hindutva pusemer Yogi Adityanath-i Uttar Pradesh Chief Minister inyaktsü tenzükba sülen aser Mongulbarnü Supreme Court-i iba onük atema ken o benokertem tsüngda angatetteptsü tetuyuba agütsüba sülen VHP-i iba osang sangdongogo.
VHP-i ashiba agi March 26 nungi April 16, 2017 tashi ‘Ram Mahotsav’ ta ser sentong ka tenzüktsü.
“March 28 nungi Hindu New Year tenzüker. New Year matongdang anogo ana jelia onoki Ram Mahotsav ta ser sentong ka tenzüktsü. Iba mapang onoki yimtsüngtem semdangtsü aser iba mapang Lord Ram indang taküm osang metetdaktsü. Onoki block headquarter shia nung Jagran Yatra tenzüktsü aser Ayodhya nung Ram Temple yanglutsü atema takhangba agütsütsü. Iba tekülem ki yanglutsü atema sota mayutsüla” ta Western UP aser Uttarakhand atema VHP Zonal President, Ishwari Prasad-i metetdaktsü.
“Iba sentong ya linük ajungalen agitsü aser yimtsüng lakh 2 jungnüa asemtsü. Onoki UP nung tongti süa agitsü kechiyong iba nung Ram Janmabhoomi lir. Yimtsüng lakh 2 shi ka nungi 70,000 shi ka UP nung asütsü. Kobi melii nenoki item yimtsüngtem nung ‘saffron flag’ ayipketba angutsü” ta Ishwari Prasad-isa ashi.
Tang UP nung CM Yogi ya Hindutva mongin nisung ka ama züngshir aser pa dak nungi kechi imlar ta osangbenertemi asüngdangdang, “UP CM-i iba sentong pusema nungittsü ta onoki imlar. BJP ya Centre aser state nung tashi lir. Yimtsüng lakh asem dak tema nungi Ram külemertemi lung bendentsür aser joko lung teimbaka bendenogo. Maneni Ram Temple fund renema lir. Ajisüaka, tekülem kiji Ram asoba tesem shitak nung yanglutsüla. Iba asoshi CM-i tebilemdangba kecha malitsüla” ta Ishwari-i langzü.