VHP-i Ram tekülem ki yangluzüktsü atema anogo latettsü

Meerut, December 05 (Agencies): Babri Masjid raksatsüba sülen küm 23 ajungtsü anogo ka lia Hokolbar nü Vishwa Hindu Parishad (VHP)-i, Ayodhya nung Ram tekülem ki yangluzüktsü atema anogo ka lateta ayutsü, aser iba mapang nungjibosa tekülem ki tembanga yanglutsü merangtsü, ta ashi.
Meerut nung osangbenertem den jembidang VHP nung tongti lenir kati ashiba agi, parnoki Ato kilonser Narendra Modi dangi shidi ka zülua, Ram tekülem ki yanglutsü ta nangzükba ajanga parnok sorkar tashii aru ta nenshia ashitsü.
Paisa, January ita tashi nung sorkari telangzüba tajung ka magütsütetra VHP-i asentenshir tekülem ki yanglutsü atema akhangtsü, ta ashi.
2010 küm Allahabad High Court-i iba ali shilem asem nungi shilem ka Sunni Waqf Board nem agütsütsüla ta obendang agütsübaji VHP-i magizüker, ta paisa ashi.
“Raksatsüba (Babri Masjid tekülem ki) anogo, Honibar nü nüma tangtetba anogo ka ama onoki senden ka ayongzüka akatsü. Ibatu (Muslim tekülem ki raksatsüba) Hindu nunger atema telongjem mapang ka liasü. Ajisüaka Ram tekülem ki yanglutsü akhangtsü atema-a süoka jembitsü. Iba mapatong lenir Ashok Singhal-i pa akumli mapang tekülem ki yanglutsü aliba mongui alima nungi pilaogo. Modi’er sorkar tashii arur küm ka ser tesadang jungogo, saka iba onük nung terenlok mali. Sorkrai iba onük nung parnok tangatetba tejangja magütsü,” ta VHP otongdar aser Shamli nung district Tir, Subhash Malik-i ashi.
Paisa, “VHP bangtak lenirtem senden amentsü aser iba tekülem ki tembanga yanglutsü atema anogo ka latettsü. Iba sülen onoki Ato kilonser dangi shidi ka zülua pa nem osang ka metetdaktsütsü. Iba onük nung onoki telangzüba ka aginer aser sorkari telangzüba magütsütetra onoki January 2016 nung mapatong ka tenzüktsü. Nüburtemi Ram tekülem ki ka aginübayong par sorkar tashii aru ta parnoki mamatoktsüla. Nüburtem tejangrabaji parnoki akhümtsübutsüla,” ta ashi.
Malik-isa, 2010 küm HC-i iba mangatettep liji shilem asem lemdangtsü obendang agütsüba nung au masür, ta ashi.
Muslim aser Hindu nunger na tsüngda ali raktepba ken o nung Allahabad High Court, Lucknow Bench-i, Ayodhya nung mangatettep aliba aliji Hindu aser Muslim naprong meyong, anungji ali shilem asem nung shilem ana Hindu telok nem aser shilem ka Sunni Waqf Board nem agüjang, ta obendang agüja liasü.
“Kodaser court kati mosque (Muslim nunger tekülem ki) atema ali agütsür (?) Parnoki Ayodhya nung mosque ka yanglunüra parnoki Sarayu ayong tip külenji yanglutettsü. Iba ali ya Lord Ram asoba tesem aser iba li nung mosque yanglutsüji onoki magizüktettsü,” ta VHP lenirisa shisem.