VHSNC atema training agütsürtem nem training agütsü

Dimapur, April 27 (TYO) : Govt. of India tetuyuba nung aliba ama VHSNC mesüra VHC (Village Health Committee) tem nem parnok teinyaktsütem angatetdaktsütsü aser tangatetba nung renlokdaktsütsü mechi nung anogo asemnü munga Village Health Sanitation & Nutrition Committee (VHSNC) atema training agütsürtem nem training agütsüba {Training of Trainers (ToT)} sentong April 26, 2017 nü nungi tenzüka Conference Hall of Directorate of Health & Family Welfare (DoH&FW) nung agidar.
District tem nungi iba sentong nung shilem agitsü asoshi arurtem agizükba mapang State Program Officer (SPO), NHM, Nagaland, Dr.Thanghoi Lam-i, iba training ya asate nung anema aliyim tsütsü temelenshi adokdaktsüba mezüng mera alitsü, ta ashi.
Pai, iba sentong nung adener ajaki iba training kanga süoki ia agitsü ayongzüker, ta ashi.
Joint Director Planning and Project Director, National Health Project (world Bank), Dr.Vizolie Suokhrie-i tarurtem den Communitisation Act 2002 nung tuyua aliba sorkar sentong lemsatep aser sorkari iba Act nung aliba reprangshitsü sentong renemba metetdaktsü. Balakata iba asoshi inyakertemji yimtsüng shia nung tetsür aser tebur shilem kasa asütsü indang pai rateta ashi.
Pai, asenoki District Head quarter dak dang temulung agütsür saka yimtsüng jenjangbo züzüi toktsür, ta ashi.
Addl. Director, H&FW, Dr.Limaakum Jamir-ia, training agütsütsüpur dang kanga nendaka inyaktsü ashi aser iba training ya mapa tena agiba training ka asütsüla, ta ashi. Asenoki pei tata mapa nendaka meiyakba ajanga temang amena ali mali jangjaba inyakyim kanga ajema kümogo, ta pai ashi.
Iba ToT sülen training agürtemi District aser Block level nung training agütsütsü.
Iba sentong nung shisalen sayurtemji, Project Officer-Operations (UNDP), Wb. Rajesh Khartu Mousang, Program Manager, Training, NHM, Wb. Puni Kokho, aser Community Mobilisor, RRC-NE, Wb.Amit nunger lir. Iba training ya State Health Society, National Health Mission, Department of Health & Family Welfare-i ayong aser training agir rongnung Dy.Chief Medical Officer tem, District Immunisation Officer tem, District Program Managers (NHM) tem, District Media Officers (NHM) tem, District Community Mobilisors (NHM) tem aser Dy. MEIOs & MEIOs (IEC Bureau, DoH&FW) tem dena lir.