Vicca Aye-i Dy CM anema Nagaland Lokayukta nem ken o agütsü

Kohima, February 20 (TYO): Brihostibarnü Nagaland Lokayukta-i State Chief Minister, Neiphiu Rio dang, Police Department nung tim mesüi constable 1100 dak tema shimba nung Deputy Chief Minister, Y Patton-i shilem agia lir, ta tai tonglokja alibaji bushisüngdangtsü atema tuyuogo.
Zünger mapa mangur lanur, Vicca S Aye-i ken o ka agütsüba nung ajemdaker Nagaland Lokayukta, Justice Uma Nath Singh-i iba tetuyubaji agütsü.
Police Dept. nung tim mesüi constable 1135 shimba maparen nung shilem agia lir ta tai tonglokja aliba dak sendakba nung Aye-i Dy CM anema Lokayukta nem temepishiba ken o agütsü. Brihostibarnü Aye-i, pai Home Dept. in-charge, Patton anema ken o benokogo, ta metetdaktsü.

Temepishiba shidi ajanga Aye-i, Patton-i NPSC written tatidang nung takok angurtem dang interview stage nung teyari atema pa ajuruang ta shiogo, ta aitsü.

Paisa, tesüiba küm tenet tashi Home Department Minister inyakdang Patton-i ketdangsüba tsütsü tashi tali amshi aser tejak repranga inyakba ajanga police department administrative tsütsü timtem agütsüogo, ta shia lir.

Aye-isa, Patton-i Police Department nung 1135 appointment asü, item post atema advertise masü, ta metetdaktsü.

2013-18 nung NPF yimsüsüba mapang Patton ya Home Minister liasü aser 2018 küm election agitsü lia pai NPF toktsür BJP nung dena NDPP den teloktep sorkar nung Deputy CM shim aser maneni pai Home Department bena lir.

Ano külen Nagaland Lokayukta-i Nagaland Lokayukta Police Establishment kübok Coordinating Officer/Inspector dang, temaba ketdangser- state Chief Minister-i bushisüngdangtsü atema Preliminary Inquiry ken o ka benoktsü tuyu.

Lokayukta tetuyuba nung shia aliba agi, taruba ken o angadangba anogo matongdang Chief Minister-i affidavit nung report ji agütsütsü.

Lokayukta-isa Deputy CM Patton danga pa anema tai tonglokja aliba dak sendakba nung affidavit nung telangzüba agüjang ta tuyuogo.

Lokayukta-i Nagaland Police, talisa Commissioner of Police Dimapur dang “Whistle Blower” category nung alisang- ken o benoksang nem security agüjang, ta tuyuogo.

Lokayukta-i report aser affidavits lia April 4 nü maneni iba ken o ya angadangtsü.