Vice president-ji agütsüra inyaktsü mulunga lir: Dr. S.C Jamir

Mokokchung, April 29 (TYO): India Vice President inyaktsü maongka agütsüra inyaktsü mulunga lir, saka pai iba menden atema shinga danga asüngdanga mali, ta Odisha Governor Dr. S.C Jamir Mokokchung tonger külen par kidang iba osangbeneri jembidang ashi.
“Ni vice president menden atema shinga danga masüngdang saka agiang ta süra agitsü”, ta iba osangbeneri asüngdangba ka langzüdang metetdaktsü.
Iba osangbeneri pa dang Nagaland tia indang asüngdangdang, “tang Nagaland-ji ajak lir ama, saka shinga mali ta asüba tia ka nung lir”, ta pai temulung shiranga ashi. “Inyakyim (system) ajak lemtamatadokogo, yimdena lishitsüng nung asong ama kümogo”, ta paisa shisem.
Ya kechiba ta süra, “bureaucracy akhi ama tazüokba mali, akhi ama nendaka inyakba mangur”, ibaji kechiba süra “yimden lenisüba tsütsü (tila nungi tulu tashi) nüburtemi timtem agütsür aser parnok nem bilemdangtsü mapang magütsür”, ta pai ashi. “item ajakji election inyakyim tai ajanga lir”, ta paisa shisem.
“Onok mapang nüburtemi yimden asoshi vote agütsü, saka tanübo nüburtemi pei vote sen yong yoka achir”, ta ashi. “Vote ya kanga senti lir, iba ajanga linük aser tarutsü alima yanglur, saka asenoki ibai shishilembadok nung govt-jia shishilembatsüsa akümer”, ta kuli kar ashi. “Metsüjang kechi prokdir süngjanga ibaji dang adoker, anungji, shinga aitsütsü makok, saka ibai asenok tai lir”, ta paisa shisem.
Iba osangbenerisa Nagaland ULB election dak sentakba indang metetnüa asüngdangdang, “Naga nunger mapa ajak mangmanga dang inyaker, lenmangbo lir sürnung mejembiteper aser jembibajia mejembi ama akümba agi tatembang kati marur”, ta langzü.
Paisa iba dak sentakba nung ashidang, longkak aitba toa tajangzük kecha mangur, iba sülento kecha ola mali kümogo, joko aniadokogo südi. “Iba sülenji kechi inyaktsüla ta asübaji alitsüla”, ta paisa shisem.
Paisa election merüka agidaktsünüba olen kar ashidang, “Nagaland ya Khristan lima, anungji, Khristantemi ochi angatettsüla, merüka alitsüla aser Tsüngrem angatettsüla”, ta paisa ashi. “Kodang Tsüngremji angatetdir Pa sentongjia asenoki angatettsü kechiyong Tsüngremi tajung dang bilemer aser Khristanpur shiai peisasa angatettsüla”, ta paisa shisem.
“Naga lima jungdi süra lanurtem lenla ajak nung asentenshi nüngdaker, joko akhi otsü mejembitsüla saka tanü tensa den apet kechisarena ajak melenshitsüla”, ta paisa inyakdaktsünüba olen ka ashi.
Paisa Naga yimden tebilemtsü onük dak sentakba kar lemsatepdang, “kü tebilembaji kanga tejangja lir, Naga yimden tebilemtsü ya yimden tebilemtsü lir, kechiyong India nüjiso mangudang nungi Naga nungerji nüjiso meshia liasü”, ta pai ‘Simon Commission’ indang tatishitsü bener arua ashi.
“Nagaland ya tanga state dang nungi khenyongi balaka lir, kechiyong Nagaland state akümba yabo yimden olemtep (political agreement) ajanga yangluba lir aser India nung iba ama tenzükbaji ibai mezüngbuba lir”, ta Jamirisa ashi.
“Naga yimdenji bendangeri lemtettsü makok aser bendanger yimdenji Naga nungeri lemtettsü makok, Naga yimden tebilemtsüji Naga nunger den jembitsüla aser iba jagi dang telemtetbaji agitettsü”, ta paisa kanga jangja ashi.
“Yimden kenoji merük-merüka lir asünung, joko mapang meindoki tarutsü Naga nunger koma aotsü ta asübaji dang jembitsüla”, ta paisa shisem.
Narendra Modi-i aniba NDA sorkar indang metetnüa asüngdangdang, “nüburtemi parnok nem tashi ulura agüjadok, saka tashi nung lir ta sür pei inyaknütsü ajak inyakbajia tim masü”, ta pai ashi. NDA sorkar ya yimden onük (political agenda) dang masü saka tanga onük dena lir, anungji, minority atemabo lenmang sadema mangur, ta paisa tatalokba kuli kar densema ashi.
Pa ya Moatsü benjong amungi aruba lir aser May 3 nüji meyipa aotsü, ta osang ajanga angazüker.