Vidal-i Bayern telok den sen mn 44 jenjang tezüngzüktep agiogo

Berlin, July 28 (Agencies): Chile nunger midfielder, Arturo Vidal-i Juventus telok toktsür Bayern Munich telok nung taruba küm 4 tashi züngsema asayatsü asoshi dollar sen million 44.23 jenjang aketba tezüngzüktep tembanga agiogo.
“Nü kü indang football asayatsüren jenjang tajungba kümdaktsütsü nükjidong nung mera tasen ka agitsü lemteta Bundesliga asayamong champion telok, Bayern den tezüngzüktep agiogo,” ta arishi küm 28 tain Vidal-i tanü Mongolar nü metetdaktsü.
“Champions League amala tongti takok marok agizüktsü alizüng tulu ayuba sülen Bayern telok nung züngsema maneni football toktepa asayatsü renemer lir,” ta pai ashi.
Barcelona teloki goal 3-1 agi Vidal densemba Juventus telok madak final asaya koka Champions League takok marok taoba June ita agizüka liasü.
Brazil nunger midfielder, Douglas Costa-i par Shakhtar Donetsk telok toktsür Bayern telok nung züngsemtsü tezüngzüktep tan July ita tetenzüklen agiba densema Vidal ya Bayern telok nung züngsemtsü asoshi tezüngzüktep agir tongti asayar tanabuba akümer lir.
Bayern telokia par asayar, Germany nunger Bastian Schweinsteiger England nung tentetba Manchester United telok dang ayokba osang bushiteta lir.