Video Consultation of Tele MANAS tenzükogo

Dimapur, Mongputeni/Oct. 10 (TYO): Mental Health Day nüngtem nung sentong akhumdong aser Secretary, Department of Health & Family Welfare, S. Tainiu-i October 10, 2025 nü Directorate of Health & Family Welfare indang Conference Hall, Kohima nung ‘Video Consultation of Tele MANAS’ tenzüktsüogo.

Tele MANAS ya Government of India indang sentong ka lir, koba nübur ajunga nem mental healthcare teyari agütsütsü nükjidong nung angati 24/7 tele-mental health services agütsütsü atema tenzükba lir.

Iba yagi toll-free helpline no- 14416 aser mobile application ka ajanga counseling, psychotherapy aser psychiatric consultations agüja National Mental Health Programme (NMHP) nung digital component ka agütsür aser nüngdakba mapang in-person service den sensakteptsür.

Iba sentong nung jembidang, “Access to Services-Mental health in catastrophes and emergencies” omen nung alima ajunga den külemi World Mental Health Day 2025 amunger, ta Tainiu-i ashi.

Omen yagi koda masü timtem mapang mental health tajungba nung yaritsü nüngdakba indang ashir, ta lai ashi.

Mental health tebilemtsü indang awareness agütsütsü nükjidong nung World Mental Health Day ya October 10, 1992 nung mezüng munga liasü ta ashi.

Rara, pandemics, alimar lendong aser lokti anisüngzük maliba nungi tenzüka alima nung ‘humanitarian emergencies’ tali akumer. Iba ama mapang nung nüburtem aoksaba, mangyimba, tebilemtsü akaba, amoa maoba amala ajurur, koba ajanga temang shi nung kongshiba kisüng masü saka tekolok nunga zübu yutsür, ta lai ashi.

Ajisüaka tekolok anema alitsü asoshi anepaluba mali, mezüngshir aser emergency response indang components nunga sen peria magütsür. Anungji World Federation for Mental Health (WFMH) ajanga timtem mapang yahriteptsü asoshi ayongzüker.

2025 campaign ajanga sorkar, NGOs aser health systems dang alima lendong timtem asoshi renemshia alitsü, telangzüba agütsütsü aser taneptsü agütsütsü asoshi mental health nung temulung agütsütsü ajungshir, ta ashi.