Videocon-i Kokalta nung mobile yanglutsü tenzükogo

Kolkata August 29 (Agencies): Kolkata, Salt Lake tesem nung aliba Videocon group meyong kongsang nung Honibar nü nungi mobile handset yanglutsü tenzükogo.
“Onok meyong Salt Lake factory nung onoki mobile handset yanglutsü tanü Honibar nü tenzükogo. Anüdoklen tsütsü ibai onok meyong mobile handset yangluba mezüng kongsang asütsü,” ta KAIL Limited (Videocon group) nung COO, Indrajit Ghosh-i Press Trust of India (PTI) dang ashi.
KAIL Limited ya Videocon group nung shilem ka lir aser parnoki tanga oset aika yangluba den külemi refrigerators, ACs aser LED TV tema yanglur.
Mr Ghosh-i ashiba agi, Aurangabad, Maharashtra nung aliba mobile yangluba tesem sülenbo tan salt nung lapkoba ya Videocon group meyong tanabuba mobile yangludak tesem asütsü.
Salt Lake factory nung mobile phone market noklang nung shilem 40 shibo tongtettsüsa yanglutsü koba nung smartphone aser tablet tema yanglutsü, ta Mr Ghosh-i metetdaktsü.
Tan phone yanglutsü mezüng mapa tenzükba mapang sen srore 50 enokogo aser küm shia phone million asemsem yanglutsü tebilemba lir.
Hindu nunger benjung, Durga Puja mapa nungi smartphone tem yanglu tenzüktsü, ta paisa ashi.
Tarutsü mapangtem nungibo tanga company meyong mobile handset tema yanglutsütsü asoshi Videocon group tebilemba lir.
Parnoki smartphone design asütsü asoshi Shenzhen, China nunga centre ka lapoka lir.