Vienna senden nung shilem agirtemi onük melenshitsüsa akümer

Vienna, November 14 (Agencies): Islamic State (IS) kiralongrar teloki France kübok Paris yimti nung yasüng, Hokolbar aonung lendong kanga sashia atalokdaktsüba yong tanü, Honibar nü nungi tenzüka Austria yimtiba, Vienna nung senden amenertemi Syria masa saka IS den sentakba onük ang tongtipangsüa benoka jembitsüsa tensa ajuruogo.
Küm 5 shi tejaklen nungi tenzüka Syria Tir, Bashar al-Assad-i aniba Syria sorkar aser sorkar anemer na tsüngda mangatettep tulu adoka tongpang kanga sashia rarabaren anenja par telok ana tsüngda yimjung tezüngzüktep agidaktsütsü nükjidong nung United Nations (UN) aser European Union (EU) na den külemi, alima linük 17 shi nungi lenirtemi tanü nungi tenzüka Vienna nung senden amen tenzüka lir.
Tan senden amenba ya densema, Syria tensa jundaktsütsü nükjidong abenba alima lenirtemi tan agi tanabuba senden amener lir.
Aji oda, Syria pusemba linük ana, Russia aser Iran na den adokba mangatettepbaren benteta Syria nung teti asoshi yimji yimjung lidaktsütsü nükjidong nung alima lenirtemi tan senden ayonga amenba osang jangjaogo.
Ajisüaka, Syria nung election agia sorkar tasen tentettsütsü onük melena IS telok madak takok ngua raratsü tasa aser onüktem ang tanü senden nung shilem agirtemi benoka jembia liasü.
“Tan senden nung shilem agirtemi alima ajungi ka küma lungjemer IS telok meshimeshia samatsütsü lenmang bushitsüla,” ta France Foreign Minister, Laurent Fabius-i tanü senden tenzükba jakdang metetdaktsü.
Peisasa pokseta asütsütsü mulungteter aser tongpang nung amshitsü prangpong abener telok kati Paris yimti nung yasüng lendong atalokdaktsüba sülen tanü tashi nung ishiba agi nisung 27 asüba aser nisung 200 dak tema yiruba osang bushiteta lir.
Ano, yasüng lendongji par züngsemtemi atalokdaktsü ta shia, tan Syria aser Iraq na indang lushi tulubaka tashiyim agi agia aliba IS teloki tan lendong atalokdaktsüba atema tenüng agia metetdatksüogo.
Syria ken o nung ajemdaker tesendaktep mejungi aliba US aser Russia linük natia par mangatettepbaren tezülen yuja, IS telok anemtsü maparen nung France pusema par linük den yariteptsü tenangzükba olen ka tanü metetdaktsüogo.