Vienna senden nung Syria’er ken o bentettsü merangtsü: Kerry

Vienna, October 29 (Agencies): Austria kübok Vienna yimti nung amentsü ayongba sendenji Syria nung mangatettep tulu adoka küm 4 dak tema rarabaren bentettsütsü asoshi maongka tajung lir ta shia, kasa senden nung Syria’er ken o bentettsü merangtsü alizüng ayuba olen ka US Secretary of State, John Kerry-i tanü Brehostibar nü metetdaktsüogo.

Asüng, Hokolbar nü amentsü ayongba Syria yimjung senden nung shilem agitsü asoshi US, Russia, Saudi Arabia, Iran aser Turkey nungi lenirtemi terenemshiba tulu agitsü tenzükba osanga jangjaogo.

Ajisüaka, tan ayongba yimjung senden nung Syria Tir, Bashar al-Assad-i aniba Syria sorkar aser Syria sorkar anemertem ka danga mejaoki aliba osang jangjaogo.

Syria nung tongti shilem agirtem medenaka, tan senden amenba ajanga alima lenirtemi Syria’er mangatettep ken o bentettsütsü teimla tulu ayuba olen ka Kerry-isa metetdaktsüogo.

“Syria den sentakba ken o benteta par linük nung yimji yimjung tensa bener arutsütsüji kanga dang tasak lir. Ajisüaka, alima lenirtemi tan Vienna yimti nung senden amenba ajanga Syria asoshi yimtenren tebentetbaren tajung bener arutsütsü imlar,” ta pai ashi.

Paisa ashiba agi, Syria’er ken o bentettsütsü nüjidong nung tan amala yimjung senden nung shilem agitsü aser Syria nung tentetba Islamic State (IS) kiralongrar ajunga samatsütsü densema, par US-i yimya anasü nung tongti shilem agitsü tenzüka lir.

“Syria nung talisa, Raqqa yimti nung tentetba IS telok makdoktsü nükjidong nung ozü US-i aniba alima teloktep mitkartemi Syria andoklentip tsütsü tentetba Syria sorkar anemertem nem tongpang nung amshitsü osettsüset agütsüba den külemi, ozü teloktep mitkartemi tayimtsü amshia IS telok anema taoba mapang nungi tesashiba raratsü sentong renema lir,” ta paisa shisem.

Ano külen, Iran-i mitkar teyari agüja Assad-i aniba sorkar den yarisemba yong tan Vienna nung amentsü ayongba senden nung Iran-i shilem agitsü renemba maparen magizükba olen ka Syria sorkar anemertemi metetdaktsüogo.

Ano, “Tan senden nung Syria nüburtem mejaokba ajanga Vienna sendenji tanur kazüteper ama akümer,” ta Syria sorkar anemba tongti telok, Syrian National Coalition züngsem, George Sabra-ia kanga jashia ashi.