Vietnam-i 1 buba tetsür Assembly mendenbula shimer

Vietnam kübok Hanoi yimti nung agiba Vietnam Communist Party senden shibangba sentong nung Vietnam Communist Party General Secretary tasenba, Nguyen Phu Trong (Tejaklen, tiyongtsü) aser Politburo züngsemtem – Tran Dai Quang (Abelen, tanabuba), Nguyen Xuan Phuc (Achijilen, tanabuba) aser Nguyen Thi Kim Ngan (Achijilen) nungeri shilem agiba noksa nung angur. (Hanoi, January 28)

 Ho Chi Minh City, January 28 (Agencies): Vietnam nung tentetba Communist Party yimtenren teloki par General Secretary, Nguyen Phu Trong kümsük atsünglangtsüba den külemi, par linük indang yimtsütsü menden tematiba nung amentsü asoshi tetsür yimsüsür ka shimogo.

Communist teloki par senden tatembangsüa tanü amenba sülen par lenirtem shimba osangji alima dang sangokja liasü.

Vietnam Ato Kilonser, Nguyen Tan Dung-i par yimsüsütsü menden melenshija pai Trong menden agitsü akok ta ita ishika tejaklen nungi jembia aru saka nüburtemi bilema ama mataloki Trong nem maneni General Secretary menden bendaktsüba osang jangjaogo.

Aji oda, tan senden amenba sülen Communist teloki Ato Kilonser atema Deputy Prime Minister, Nguyen Xuan Phuc; Tir menden atema Public Security Minister, Tran Dai Quang aser National Assembly mendenbula atema Legislative Vice Chairwoman, Nguyen Thi Kim Ngan nunger tan shimer lir.

Ngan ya par Communist telok nung tematiba jenjang abentsü maongka angur mezüngbuba tetsür yimsüsür akümer lir.

Ngan ya Vietnam anülulentip tsütsülen nungi adokba yimsüsür ka lir, Phuc Vietnam tiyongtsülen aser Quan o Trong na Vietnam anüdoklentip tsütsülen nungi lir.

“Tan shimba lenirtem ya Vietnam linüki alima ajunga den tesendaktep tajung yanglua par linük tejakleni anitsü mangdang ayuba lenirtem lir,” ta Hanoi nung tentetba Academy of Policy & Development nung professor, Pham Quy Tho-i metetdaktsü.

Tan lenir tasen shimba sülen Vietnam linük indang rongsenren aser lokti tentet shilem nung temelenshi alitsü imlaba olen ka paisa metetdaktsüogo.