Vietnam-i France nungi nüchiso ngur küm 70 abensaba sentong agir

Vietnam’er tetsür signal force mitkar ketdangsertemi Hanoi kübok BA Dinh square nung tanü Bodbar nü agiba 70 buba National Day anogomong sentong nung parade ia shilem agiba noksa nung angur. (Hanoi, September 02)

 Hanoi, September 02 (Agencies): Vietnam-i France yimli nungi nüchiso ngur küm 70 abensaba bilemtetba sentong tanü Bodbar nü Hanoi yimtiba nung agiogo.

Vietnam linük tentetba Tir, Ho Chi Minh-i Democratic Republic of Vietnam linük tentetba sangdong yimjak nung sangdongtsür küm 70 abensaba bilemtetba sentong nung tetsür kaketshir nungi mitkartem densema ishiba agi nisung 30,000 shi tanü shilem agiba osang jangjaogo.

“South China Sea densema mangatettep ken o balala adokba mapang nung asen mitkar tashi tali itshidaktsütsü nungdaka kümogo,” ta Hanoi kübok Ba Dinh square nung agiba sentong nung o jembidang, Vietnam Tir, Truong Tan Sang-i tanü metetdaktsü.

“Iba amala mangatettep ken o balala adokba ajanga asen Vietnam nema tensa tamajung bener arutsütsü ana nung dang lir. Anüngji, asen linüki mapang jilia renemshitsüji kanga dang tongtipang,” ta pai ashi.

Minh-i tesüiba mapang, 1945 nung linük nüchiso anguba osang sangoktsüba sülena Vietnam-i maneni küm 9 tashi tongpang raraba sülen anga France nungi shitakba nüchisobo 1954 küm ang angu.

Küm ishika tejaklen nungi tenzüka Vietnam indang rongsenren jenjang tajungba akümba osang bushiteta lir saka par linüka kidangsüa aliba China linük den South China Sea den sentakba mangatettep ken o adoka lir.

Ano külen, China-i asüng, Brehostibar nü agitsü ayongba Asia nung World War II tongpang tembanger küm 70 abensaba bilemtetba mitkar sentong nung Tir Sang-ia shilem agitsü renemba osang jangjaogo.