Vietnam-i tasüba temerenshi agientsü ozüng latetshir

Hanoi, November 27 (Agencies): Ochimashi inyakba lenir aser ketdangsertemi ozüng alema bendenba sen noklang nung shilem 75 meyipja par tai nangzükra, parnok nem tasüba temerenshi masü saka taküm tepiyong tepuokdak puoka ayutsü temerenshi agütsütsü asoshi Vietnam-i ozüng tasen küma tanü Hokolbar nü latetshiogo.

Tanü Vietnam National Assembly senden nung yimsüsürtemi agizükba Penal Code tanaben reprangshitsü mapatong den sentaktepa, ochimashi inyaker nem tasüba masü taküm tepiyong tepuokdak puoka ayutsü temerenshi agütsütsü ozüng tasenji latetshir lir ta VnExpress online osangi metetdaktsü.

Taruba 2016 küm July ita 1 nü nungi tenzüka mapa küma benshitsü asoshi tan ozüng latetshiba sülen arrür nem peisasa bendanga agütsür, linük kümzüka ayutsü osettsüset raksatsür, rakzükraktemer, ozüng alema mozü mora achir, ozüng alema mozü mora shibelener aser nübur nem timtem bener arutsütsüa chiyongtsü tamajung yanglua ayoker nisungtem nem taoba mapang agütsüba tasüba temerenshi joko magütsütsü renemogo.

Ano, arishi küm 75 ser tema tain nisungtem nema tasüba temerenshi magütsütsü asoshi tan ozüng tasen küma latetshiogo.

Ajisüaka, tan ozüng tasen latetshiba ajanga ozüng alema inyakertem tali temulung uludaktsütsü ta shia, opposition yimsüsürtemi tebilemtsü akaba olen ka metetdakja liasü.

International jenjang nung nübur temeten asoshi nokdakba tentettem aser West-i mapang talang ka ajungshia aruba sülen Vietnam-i tan aibelener nem tasüba temerenshi agütsütsü ozüng agiener lir.