Vietnam-i tepuokdak puoka ayur chioktsü ajungshir: US

Washington, April 26 (Agencies): Vietnam sorkari yimtenren ken o nung ajemdaker par tepuokdak puoka ayurtem chioktsü aser nübur temeten asoshi nokdakertem ajemrepa ayuba maparen anentsü tajungshiba olen ka US sorkari tanü, Mongolbar nü metetdaktsüogo.

US Tir, Barack Obama-i taruba May ita Vietnam semdangtsü sentong renema lir aser iba semdangtsü sentong agiba jakdang Vietnam-i par tepuokdak puoka ayurtem chioktsü asoshi US sorkari ajungshir lir.

“Vietnam aser US na tsüngda sentaktepshitsüren nung nüburtem nem agütsüba temeten anema inyakba maparen anentsüji tongti onük ka lir,” ta US State Department otongdar, John Kirby-i metetdaktsü.

US kübok Washington nung par linük ana tsüngda amenba 20 buba Human Rights Dialogue senden nunga nübur nem agütsüba temeten anema inyakba onük tongtipangsüa benoka jembiba osang angazükogo.

Vietnam sorkari yaküm, 2015 küm December ita tomlen tashiyim agi nübur temeten atema inyakba okatsür, Nguyen Van Dai tashiyim agi apuba atema tebilemtsü akaba osanga US ketdangsertemi lemsatepogo.

Ano, democracy inyakyim anema inyakba aser pei tebilemba tetsükdakba kecha meli lemsateptsüren nung aibelenba ken o nung ajemdaker, Vietnam sorkari internet blogger, Nguyen Huu Vinh nema küm 5 tashi tepuokdak puoka ayutsü temerenshi taoba March ita agüja lir.

Vietnam sorkari nüburtem nem election sentongtem nung pei temeten mamshidaktsüi nokdangba, yimdong nung sentepa lokti senden memendaktsüba aser iba amala nübur nem agütsüba temeten amokbanga ayuba osang ka State Department-i yaküma benoka liasü.