Vietnam nung aliba bus garitem nung camera inoktsü

Hanoi, April 10 (Agencies) : Vietnam nung aliba Ho Chi Minh yimti nung jajaba bus garitem ayimjema acha ayangtettsü atema bus gari ajak nung surveillance camera inoktsütsü, ta Deobarnü municipal transport department sangdong ka ajanga metetdaktsü.
Bus gari telung nung auyaba aser tetsür dak tashiyim mapa tamajung inyakbatem nokdangtsü aser item mapatem anema raratsü nükjidong nung iba inyakyim ya tenzükerba lir aser iba mapa taküm küm matem dangsa renemtsü, ta municipal transport department nung Public Transport Management Centre ajanga metetdaktsüogo.
Bus gari shia nung camera anana inoktsütsü aser gari shia nung inoktsü camera aliba den inokdaktsüba taa ajak senteper Vietnam sen million dong 13 ($580) adoker, ta Xinhua new agency osang ajanga metetdaktsü.
Taküm kümsa Ho Chi Minh yimti lenmang 28 nung jaja aliba bus gari tejen 500 tashi tasen agi melenogo aser iba den külemi ticket alitsü atema ‘smart electronic ticketing’ inyakyima ka lapokogo, ta centre sangdong ka ajanga ashi.
Ho Chi Minh yimti nung tang bus gari ajak agi 3,000 shi lir aser item gari timba ka 2002 nungi 2007 küm tsüngda nungi jaja tenzük.