Vijay Hazare Tourney: Nagaland-i Mizoram akok

Dimapur, Mongputeni/October 6 (TYO): Tanü Anand, Gujarat nung Nagaland senior cricket team-i Mizoram team wicket 8 agi koka Vijay Hazare Mens one day tournament tembangogo. India nung first class cricket asaya nung Nagaland team tang mezüngbuba shilem agiogo aser parnoki Plate Group, Group-D asaya nung Northeast team; Meghalaya, Manipur, Sikkim, Arunachal Pradesh aser Mizoram kokogo aser Uttrakhand, Puducherry aser Bihar terara agi makok.
Iba asayamung nung Nagaland team 8 ben asayaba nung asaya 5 kokogo aser asaya 3 makok.
Multidays Ranji Trophy Yimpoksüi/November 1 nü nungi tenzüktsü aser Nagaland team mezüngbuba asaya home ground-Nagaland Cricket Stadium, Sovima, Dimapur nung asayatsü.
Tanü sangdong ka ajanga, BCCI-i nungita yariba atema Nagaland Cricket Association-i parnok tenüng asang, aser ashiba agi BCCI teyari medeni parnok iba asayamung nung shilem magitetla. Nagaland Cricket Association-isa Coach aser Support Staff den asayamung mapang Gujarat nung Naga nungertemi teyari agütsüba atema parnok tenüng asang. Maneni Vadodra aser Gujarat Cricket Association-i asayamung kanga mera keta ayongzükba atema aser Nagaland nung cricket asaya meimer temi sarasadem aser tanga nüngdakba ajak nung NCA nungita yariba atema parnok tenüng asang.
Tanü asaya nung Mizoram-i toss akok aser mezüng bat asütsü shimtetba sülen parnoki over 42.2buba nung wicket ajak out sür run 100 yanglutet.
Parnok rongnungi Taruwa Kholi-i run 33, Lalrin Sanga-i 12 aser Zorinliana-i run 17 yanglutet. Nagaland nungi bowler tem rongnung Imliwati-i wicket 3, Inakato-i 3, Abrar- 2 aser Tahmeed o Jonatha nati wicket kaka agi.
Asaya tanabuba shilem nung Nagaland team-i over 12.5 nung wicket 2 out sür run 102 yangluteta asaya kokogo.
Nagaland team nungi Jonathan-i run 9, Paras-i 26, Sedezhalie-i 15 aser Nitesh-i run 49 yanglu. Mizoram nunger bowler tem rongnungi Zoriniliana-i wicket 2 agi.