Vijay Hazare trophy nung Nagaland team-i Uttrakhand makok

Dimapur, Rongjui/September 24 (TYO): Tang tasayadak Vijay Hazare Seniors Mens One Day tournament Plate Group-D nung tanü Motibaug Cricket Ground, Vadodra nung Nagaland team-i kanga meranga asaya saka Uttrakhand makok.
Asaya nung Nagaland Captain Jonathan-i toss makokba sülen parnok mezüng bat südaktsü, saka tia maka run 32 dang yanglur wicket asem out süadok. Hokaito Zhimomi o Jonathan Rongsen na senteper run 50 yanglu saka iba sülen ano maneni team chirep tenzük. Maneni Tahmeed Rahman aser Abrar na senteper run 40 yanglu aser Abrar o Ravi na senteper run 41 yanglua Nagaland team-i over 50 nung wicket 9 out sür run 206 yanglu.
Asaya tanabuba shilem nung Nagaland bowler Pawan Surjal-i mezüngbuba over nung wicket ana agi aser Uttrakhand team run ka danga meyanglui wicket ana tuguadok. Ajisüaka iba sülen parnoki meyipa arua kanga junga asaya-a asaya akok. Asaya nung Nagaland team nungi asayar asem tashi yiruaka asaya ya over 47buba tashi asaya.
Iba tamakok sülen Nagaland team-i tang tashi nung asaya ana kokogo aser ana makok. Parnok ano asaya pezü asayatsü anunga lir. Rongjui/Sept 28 nü Nagaland team Manipur den Vadodra nung asayatsü.