Vijay Mallya ya ozüng alema inyaker ka ta PMLA court-i sangdongogo

Mumbai, June 14 (Agencies) : Bank ka nung sen apuba mapang shitak nung magutsüba dak sentakba nung Enforcement Directorate(ED)-i mepishiba ama, tanü Mongulbarnü PMLA court ka ajanga Vijay Mallya ya ozüng alema inyaker nisung ka ta nüburtem nem metetdaktsüogo.
“ED-i züluba shidi agizükogo aser  Vijay Mallya anema sangdong metetdaktsür,” ta Special Judge PR Bhavke-i ashi.
Enforcement Directorate-i court dang Section 82 CrPC kübok telemtetba ka agüjang aser Vijay Mallya ji ozüng alema inyaker ka ta sangdongang ta ashi, kechiba süra Prevention of Money Laundering Act (PMLA) kübok non-bailable warrant (NBW) den pa aputsü atema ozüng adokba aika khen tanga meinyakteti anendaka yua lir.
ED-i ashiba agi, pai agütsüba cheque nung sen maliba aser ken o balala nung Mallya aputsü atema ozüng aiben adokogo.
ED-i court dang parnoki bushisüngdangba tang kechi tashi ka nung lir ajak metetdaktsüogo aser court a parnok na senteper Mallya den asüngdangya asütsü nüngdakba shiogo.
Aputsü atema ozüng agütsüba sülen mepudaktsütsü mechi nung jenshi jajaba nisung dang ozüng alema inyaker nisung ta ajar.
Ozüng alema benshir ta sangdongba sülen iba nisungji anogo 30 tsüngda nung agüja aliba mapang nung agüja aliba tesemi arutsüla, ta Section 82 of CrPC nung shia lir.
Mallya-i Section 82 nung shia aliba mangara Section 83 CrPC (attachment of property of person absconding) nung shia aliba ama inayktsü koka lir, ta ketdangsertemi ashi.
IDBI bankBSE 4.58 % nung sen crore 900 apuba ken o, PMLA nung ED-i Mallya dena bushisüngdang mapa inyaknüa liasü.
Mallya ji India nem agüjang ta tang ED-i India-United Kingdom Mutual Legal Assistance Treaty (MLAT) dang ashitsü merangdangdar.
Mallya-i pa indang ‘diplomatic passport’ amshia India nungi March 2, 2016 nü jena ao.
Yaküm CBI-i Mallya aser tangar kar anema FIR ka benokba sülen ED-i sen ochi mashi amshiba atema case ka benok.
Ed-isa ano Mallya meyong Kingfisher AirlinesBSE 3.03 % indanga bushisüngdangdar.
Honibarnü ED-i Mallya oset sen crore 1,411 alang sen ochi mashi benshiba case nung inoksemogo.