Vijay Rupani maneni Gujarat chief minister inyaktsü

New Delhi, Dec. 22 (Agencies): Vijay Rupani maneni Gujarat chief minister inyaktsü aser Nitin Patel-a maneni deputy chief minister inyaktsü.
Tawa Gujarat assembly election mapang takok angur BJP MLA tem senden Hokolbarnü mena liasü, aser iba senden nung parnoki BJP legislature party lenir atema Rupani shim. Iba senden ya state unit Tir, Jitu Vaghani-i ayongzüka liasü, aser iba senden tembangba sülen BJP lenir aser Union Finance minister, Arun Jaitley-i iba osang metetdaktsü.
Osangbenertem den jembidang Jaitley-i, “Party telung nung o lemtepba inyakyim ka lir. Ni züngsemtem dang parnoki shiba lenir aginer ta asüngdang. Shingaia tangar tenüng mebenok, anungji ajaki melunga tena (Rupani aser Patel) shimtet,” ta metetdaktsü.
Arun Jaitley aser BJP general secretary, Saroj Pandey na leniba nung Gujarat CM aser deputy CM shim.
Tawa Gujarat election nung menden 182 nungi BJP-i menden 99 nung takok angu aser Congress-i menden 77 nung takok ngua liasü. Tanüngba menden trokji Independent candidate asem densema tangartemi angu.
CM-i anir minister tasenpurtem Khristmas anogo, December 25 nü tenangzükba agitsüa akok, ta osang angazüker. Iba anogo ya taoba mapang Ato kilonser aser BJP lenir tain, Atal Bihari Vajpayee asoba anogomong lir.
Iba sentong nung BJP-i yimsüsüba state tem nungi chief minister tem, union cabinet minister tem, Ato kilonser, Narendra Modi aser BJP National Tir, Amit Shah nunger adentsü imlar.