Vijender 6 buba tetoktepba atonga akoker tsüngteper kümogo

Bo lton, May 14 (Agencies):India nunger professional (Pro) tsüngteper, Vijender Singh-i Poland nunger Andrzej Soldra madak takok ngua, pro tsüngteper akümba sülen tanü tashi shilem agiba tetoktepba 6 prongla akoker tsüngteper yasüng, Hokolbar aonung kümogo.
Vijender-i yasüng 3 buba round nung Technical Knockout (TKO) agi Soldra madak takok angu.
Tan takok anguba densema, Vijender-i pro tsüngteper ka ama shilem agiba tetoktepba 6 prongla Knockout (KO) yimya ajanga takok angur lir.
Vijender-i 1 buba round nung Soldra laodakja yasüng kanga junga tsüngteptsü tenzük.
2 buba round nunga Vijender-i aiben tsüngokja Soldra den temaba jenjang nung tsüngtep aser 3 buba round nung Soldra tanaben menokdaktetsüsa tsüngoktsüba sülen Soldra madak TKO agi takok angu.
Ano külen, Vijender-i tan bendanglen tatembangsüa toktepa tsüngtepba sülen taruba June ita 11 nü India yimtiba, New Delhi nung WBO Asia belt atema tsüngteptsü sentong renema liasü saka iba sentongji thinentsüsa akümba osang angazükogo.
“Ni India-i tanaben shilanga ni pusemer jakdang tsüngteptsü yongyar aser iba yongji, ni terenemshiba tanen makai agitsü alizüng yua lir,” ta arishi küm 30 tain Vijender-ia metetdaktsü.
Ajisüaka, India nung tsüngteptsü ayongba tetoktepba nung Vijender den tsüngteptsü tsüngteperbo ano meshimi lir.