Vijender den tsüngteptsü nisung mangur, asaya thinener

New Delhi, March 21 (Agencies): India nunger tsüngteper Vijender Singh-i April 1 nung tsüngteptsü sentong liasü, saka pa den tsüngteptsü nisung tetemsü mongutetba ajanga iba sentong thinenogo.
“Tsüngteper shingaia pa makokba otsü aliba ajanga pa den tsüngteptsü nübu tajung monguteter. Iba region nung aliba tsüngtepertemi pa den tsüngteptsü tsübur südi,” ta IOS Boxing Promotions nung Vijender indang promoter, Neerav Tomar-i ashi.
“Tang asoshi iba sentong thinena atar aser IPL aliba sülen May ita tatemlen anogo ka shimtettsü. Pa den tsüngteptsü asoshi nübu tajung kar ngutettsü asoshi imla atar,” ta Neerav-i shisem.
Vijender ya 8 ben tsüngtepba nung ken danga tsüka mali aser pa ya WBO Asia Pacific nung champion lir.
Arishi küm 31 tain Vijender Singh ya April 1 nung China nunger WBO Oriental champion, Zulpikar Maimaitiali den tsüngteptsü liasü, saka kuli tejangja kecha magütsüi Maimaitiali-i temolung melenshiba ajanga iba tsüngteptsü sentong ya athitsüsa aküm.
Vijender aser Zulpikar na tsüngda ‘super middleweight’ asoshi tsüngteptsü liasü aser iba tsüngtepba nung takoker-i WBO Asia-Pacific aser WBO Oriental belt agitsü liasü.
Taoba küm December ita nung Tanzania nunger Francis Cheka den tsüngtepba mapang Vijender-i akok aser pai bena aliba belt shingaia magiteti lir.
April 1 nung tsüngteptsü sentong renema aliba sentong nung Akhil Kumar aser Jitender Kumar nungera mezüngbuba ‘professional’ jenjang nung tsüngteptsü liasü.