Vijender-i Amir Khan den India nung tsüngteptsü mulunger

Manchester, April 26 (Agencies): India nunger professional (Pro) tsüngteper, Vijender Singh-i Britain’er pro tsüngteper, Amir Khan den India nung toktepa tsüngteptsü mulungba olen ka metetdaktsüogo.
Mexico nunger Saul ‘Canelo’ Alvarez den WBC takokba atema toktepa tsüngteptsü asoshi terenemshiba agisang, taoba mapang world champion anaben tashi akümsang, Amir-i Vijender den toktepa tsüngteptsü olen ka metetdaktsüba sülen Vijender-i iba onükji agizüka, tena tsüngteptsü renemer lir.
Vijender o Amir nati India nung toktepa tsüngtepba ajanga India’er tsüngteptsü jenjang tajungba akümtsü maongka tajung angur lir.
“Amir-i kü den India nung toktepa tsüngteptsü asoshi benokba onük agizüker. Ajisüaka, pa den tsüngtepba jakdang ni France nunger Matiouze Royer den tan April ita 30 nü takok ngua tsüngteptsü alizüng yua lir,” ta Vijender-ia metetdaktsü.
Vijender-i tsüngteptsü mulungaka, pai yaküm, 2015 küm nungi ang tenzüka pro tsüngteptsü sabang nung tetsüng ajemokba yong küm ka mesüra ana shi süir ang Vijender o Amir nati asangsang nung tsüngteptsü akok.
Vijender-i tanü tashi nung 4 ben dang tsüngtepdanga lir saka Amir-bo pro tetoktepba 34 tashi nung toktepa shilem agia lir.
Vijender-i pro tsüngteper akümba sülen tanü tashi nung 4 ben dang toktepa tsüngtepaka, pai tetoktepba 4 prongla nung knockout yimya agi takok ngua lir.