Vijender-i Cheka akok; WBO takokba maneni ayutsü temeten angu

New Delhi, December 17 (Agenies): India nunger professional (Pro) tsüngteper, Vijender Singh-i taoba world champion, Francis Cheke madak takok ngua tsüngtepba sülen WBO Asia Pacific super middleweight takok nangri maneni ayutsü temeten tanü, Honibar nü nguogo.
Tanü tetoktepba nung Vijender o Cheke nati round 10 tashi toktepa tsüngteptsü lemzük saka Vijender-i 3 buba round nung technical knockout (KO) yimya agi Cheke madak takok nguadok.
Tan takok anguba sülen Vijender-i pro tsüngteper akümba sülen tanü tashi nung 8 ben tashi toktepa tsüngtepdang KO takokba 7 densema, tetoktepba 8 prongla akoker nungtugu tsüngteper akümer lir.
Tanü tetoktepba tetenzükba mapang nungi tenzüka, Vijender-i Cheke nem takok mongudaktsütsüsa kanga junga tsüngtepa liasü.
Vijender-i 1 buba round nung points 3-1 agi temaba jenjang ngua tsüngtepba sülen 2 buba round nunga Cheke-i 3 ben tashi takok ngua tsüngoktsüba melena, Vijender-i 7 ben tashi takok ngua tsüngokja asaya.
Haryana nunger Vijender-i 3 buba round nunga kangasa junga tsüngtepba sülen referee-temi technical KO yimya nung Vijender takoker kümdaktsü.
World Boxing Federation (WBF) Super Middleweight champion, Tanzania nunger Cheke-i KO takokba 17 densema, tetoktepba 43 nung 32 ben tashi takok ngua aru saka pai tanübo tamakok ajurua liasü.