Vijender-i Hope den tanü tsüngteptsü

New Delhi, July 15 (Agencies): India nunger professional (Pro) tsüngteper, Vijender Singh-i Australia nunger Kerry Hope madak takok angutsü ta pasasa temulung lema bilemba olen ka tanü, Hokolbar nü metetdaktsüogo.
Pro tsüngteper akümba sülen tanü tashi ken danga tamakok mongui alisang, Vijender-i Hope den asüng, Honibar nü Delhi yimtiba nung WBO Asia Pacific super middleweight belt atema toktepa tsüngteptsü renema lir.
Iba tetoktepbaji Vijender aser India ajunga atema tongtipang tetoktepba ka lir kechiyong iba tetoktepbaji Vijender pro tsüngteper akümba sülen tan mezüngsüa India nung toktepa tsüngteper asütsü.
Arishi küm 30 tain Vijender-i tanü tashi nung pro tetoktepba 6 tashi nung dang shilem agia lir saka taoba WBCC European champion, Hope-i tanü tashi nung 30 ben tashi toktepa tsüngtepdang 7 ben tashi dang tamakok ajurua lir.
“Ni asüng atongtsü yongyaseter. Küm 6 tejaklen Commonwelth Games nung toktepa tsüngtepba sülenbo ni tan India nung mezüngsüa tsüngteptsü maongka angur lir,” ta Hope den temang oudangba sülen Vijender-i metetdaktsü.
“Ni terenemshiba kanga meranga agiogo saka Vijender-i ni agiba ama terenemshiba agia mali. Anungji ni pa akoktsü ta küsasa temulung alemer,” ta temang touzük seret 74.9 taret Hope-ia metetdaktsü.
“Asüng aonung ang shitakba telangzüba angutsü,” ta seret 75.7 taret Vijender-ia telangzüba agüja liasü.
Vijender aser Hope na toktepa tsüngtepba jakdang Indian Boxing Council (IBC) nung züngsemba tsüngteper 12 aser tsüngteptsü atema jaokba Thailand nunger 2 densema, parnok 14 tashi toktepa tsüngteptsü renema lir.
Tetoktepba 7 rong nung tetoktepba kabo nungtugu tetsür tsüngteper, MC Mary Kom-i tentetba tsüngteptsü sayudak terenemshiba agir tetsür tsüngteper ana tsüngda agitsü renemba osanga angazükogo.
Vijender tsüngtepba reprangtsü asoshi saisapong sabang nungi Kapil Dev, Yuraj Singh, Mary Kom aser Sushil Kumar nungeri renema lir.
Irfan Khan, Neha Dhupia aser Diljit nunger densemba Bollywood nungi nungtugu nisungtemia asüng Thyagaraj stadium nung agitsü ayongba tetoktepba reprangtsü renemba osang angazükogo.
Ano, yimtenren sabang nungia Delhi Chief Minister, Arvind Kejriwal; Haryana Chief Minister, Manohar Lal Khattar; Congress Vice President, Rahul Gandhi; BJP President, Amit Shah aser Union Minister, Smriti Irani nungeri Vijender tsüngtepbaji reprangtsü renema lir.