Vijender-i Hungary nunger Horvath den tsüngteptsü

London, February 25 (Agencies): India nunger tsüngteper, Vijender Singh-i professional (Pro) sabang nung toktepa tsüngteptsü tenzükba sülen 4 buba pro tsüngteptsü tetoktepba Hungary nunger Alexander Horvath den taruba March ita 12 nü Britain kübok Liverpool nung tsüngteptsü renemogo.
Vijender-i yaküm, 2015 küm October ita nungi tenzüka pro sabang nung tetsüng ajemokba sülen India nung mezüngsüa taküm June ita tsüngtepa WBO Asia belt ajangzüktsü asoshi terenemshiba agitsü tenzükogo.
Middleweight temang touzük tsüngteper, Vijender-i taoba tetoktepba asemprongla round 6 tsüngda nung knockout ajanga takok ngua lir.
Vijender-i Horvath den tsüngtepba sülen hopta asem shi lir külen London kübok Harrow Sports Centre nung maneni tsüngtepa shilem agitsü sentong renemba osang angazükogo.
Arishi küm 20 tain Horvath-i tanü tashi nung toktepa 7 tashi tsüngtepdang 5 ben tashi takok ngua ajak agi pro round 31 tashi tsüngtepa shilem agia lir.
Taoba mapang Slovakia aser France na nung toktepa tsüngtepsang, Horvath-i bendanglen semdanga tsüngteptsü tetoktepba nung shilem agitsü tetsübo kecha maliba osanga angazükogo.
“Ni India-i tanaben shilanga ozü nüburtem jakdang tsüngteptsü yongyar. Ni tamakok ken danga majuruba otsü meraksatsüsa Horvath madak takok angutsü alizünga yua lir,” ta Vijender-i metetaktsü.
“Kü jakdang tsüngteper 3 tashi tamakok ajuruogo. Ajisüaka, ni takok ngua Vijender nem tamakok bener arutsür tsüngteper mezüngbuba akümtsü,” ta Horvath-ia metetdaktsüogo.