Vijender-i India PM, Modi den boxing khuret lemsateper

New Delhi, March 23 (Agencies): India nunger professional (Pro) tsüngteper, Vijender Singh-i India Ato Kilonser, Narendra Modi den ajurua India nung boxing jenjang mejungi aliba khuret tanü, Bodbar nü lemsatepogo.
London nung taruba April ita 30 nü toktepa tsüngtepba jakdang anogo 10 atema India semdangsang, Vijender-i tanü tashi nung pro tetoktepba 4 prongla koka lir.
Lenir shimtsü election nung ochimashi inyakba sülen 2012 küm nungi tenzüka India nung boxing ketdangsütsüren nung makmakshimak tulu adoka lir.
2014 küm tentetba Boxing India tenteta state tentettemi magizükba yong International Boxing Association (AIBA) kübok ad-hoc luden kati dang tang India’er boxing ketdangsütsü tashi bena lir.
Yamaji jenjang mejungi aliba yong India nunger tsüngtepertemi India tenüng nung masü saka AIBA wako kübok ang tsüngteptsüsa akümba aser Rio Olympics nunga shilem magitettsüsa tang jenjang tamajung ajurua lir.
“India’er boxing ketdangsütsüren den sentakba khuret lemsatepba den külemi, ni taküm June nung tsüngteptsü renemba tetoktepba arua reprangtsü asoshi Modi jaokogo. Ano, kü dang tuyuba ama, India’er boxing ketdangsütsüren den sentakba khureta tezüluba nung benoktsü renemogo,” ta arishi küm 30 tain Vijender-i Modi den ajurutepba sülen metetdaktsü.