Vikas-i Asian Championships silver agizükogo

Bangkok, September 05 (Agencies): India nunger tsüngteper, Vikas Krishan Yadav-i tanü final asaya nung Uzbekistan nunger Bektemir Melikuziev madak takok monguteti Asian Boxing Championships silver ang agizükba osang jangjaogo.
Temang touzük seret 75 taret Vikas-i tanü kanga meranga tsüngtep saka pai points 0-2 ngua final nung tamakok ajuru.
Arishi küm 23 tain Vikas-i tanü silver agizükbaji densema India-i tan asayamong nung silver 1 aser bronze 3 densema ajak agi medal 4 agizüker lir.
Külem sensopur, Devendro Singh (Seret 49 taret), Shiva Thapa (Seret 56 taret) aser Satish Kumar (Seret 91 ser tema taret) nungeri tasembuba jenjang ngua bronze medal ka ka agizüka liasü.
Medal agizükba den külemi, India nunger tsüngteper 6 tashi taruba October ita asayatsü ayongba World Championships nung shilem agitsü jenjang ngua lir.
World Championships ya 2016 Rio Olympics nung shilem agitsü jenjang ajangzüktsü asoshi ayongba qualifying asayamong mezüngbuba lir.
“Ozü tsüngteper 6 tashi World Championships nung shilem agitsü jenjang anguba atema kanga pelar. Vikas-ia kanga meranga tsüngtep saka pai final asaya nung tamakok ajuruba atema sasar,” ta national coach, Gurbax Singh Sandhu-ia metetdaktsü.