Vikas o Manoj na Rio Olympics nung shilem agitsü

Baku, June 23 (Agencies): Asian Games champion, Vikas Krishan aser Commonwealth Games gold medallist, Manoj Kumar nati 2016 Rio Olympics nung shilem agitsü temeten tanü, Brehostibar nü nguogo.
International Boxing Association (AIBA)-i ayonger tang tasayadak World Qualifying Tournament semifinal asayatsü jenjang anguba ajanga Vikas o Manoj nati Rio Olympics nung shilem agitsü temetenji angu.
Tan asayamong nung 2 buba jenjang abener, Vikas-i points 3-0 agi Korea nunger Lee Dongyun temang touzük seret 75 taret quarterfinal nung tsükdaktsü.
Manoj-ia points 3-0 agisa Tajikistan nunger Rakhimov Shavkatdzhon madak seret 64 taret quarterfinal asaya akok.
Vikas-i Turkmenistan nunger Achilov Arslanbek den semifinal asayatsü aser Manoji-i Britain nunger Pat McCormack den semifinal nung ajuruteptsü.
Taküm March ita agiba Asian Qualifiers nung Olympics nung shilem agitsü jenjang angusang, Shiva Thapa den Vikas o Manoj na densema, tanü tashi nung India nunger tsüngteper 3 tashi Rio Olympics nung shilem agitsü temeten angur lir.
Ano külen, International Olympic Committee (IOC)-i India’er tetsür tsüngteper, MC Mary Kom nem wildcard temeten magütsütsü lemtetba ajanga lai Rio Olympics nung shilem magitettsüsa jenjang tamajung anguba osang angazükogo.
Taoba May ita agiba World Championships 2 buba round nung tamakok ngua, Kom-i Olympics nung shilem magitettsüsa jenjang ajurua liasü.
Ajisüaka, world champion akümtsü jenjang 5 ben tashi angula, Kom nem Olympics nung shilem agitsü maongka agütsütsü temepishiba olen ka Indian Olympics Association (IOA)-i benok saka IOC-i iba onükji magizüktsü asoshi tan lemteter lir.