Vikheho-i 16 buba NSF Martyrs’ Memorial Trophy tenzüktsür

Nagaland Road & Bridges Minister, Y. Vikheho Swu; Minister, Dr. Neikiesalie (Nicky) Kire; Parliamentary Secretary, Khriehu Liezietsu; NSMDC Chairman, Dr. Neiphrezo Keditsu; NSF & ASU ketdangsertem aser Organizing Committee züngsemtemi asayamong tetenzükba asaya nung shilem agir asayar aser asaya ketdangsertem den aroki agiba noksa ka yangi angur. (Kohima, September 16)

Kohima, September 16 (TYO): Nagaland Road & Bridges Minister, Y. Vikheho Swu-i 16 buba NSF Martyrs’ Memorial Trophy tanü Bodbar nü tenzükogo.
‘Goal for Peace’ omen nung ajemdaker ita ka shi agia asayatsü ayongba football asayamong ya Angami Students’ Union (ASU)-i ayonger kümshi asayaba tongti football asayamong ka lir.
“NSF asayamong ayonga asayaba ajanga Nagaland ajunga nung alir ka küma lungjemtsüba den külemi, asayartemi takok aser tamakok jenjang naprongla ajuruaka, pei khuret koka abentsü tangazükba angur,” ta Vikhebo-i tanü asayamong lapoktsüdang ashi.
“Nagaland sorkaria Nagaland ajunga nung saispongtsü jenjang tekübokba jenjang nungi tenzüka terenlok lidaktsütsü, saisapongtsü ki o jen peria renemtsütsü aser sempet akaba lanurtem anitettsü maparen tenzüka lir,” ta pai metetdaktsü.
Ano, asayartem nem national aser international jenjang nung tangar den toktepa shilem agitsü maongka agütsütsü nükjidong nung Nagaland sorkari Department of Youth Resources & Sports, (DYR&S) nem nungdakba ki o jen renemtsü aser asayartem anitettsü khuret nunglokja lir ta pai ashi.
“Nagaland ajunga nung ayongba saisapong sentong rong nung tongtipangtiba akümtsüa ASU aser Naga Students’ Federation (NSF) nati külemi amalitepa iba asayamong kümshi ayongba atema parnok danga pelaba metetdaktsür,” ta pai shisem.
NSF tenüng nung pei taküm tenla March 20, 1986 küm agütsür 2 – Kohima nunger asür Kekuojalie Sachü aser Kigwema nunger asü Vikhozo Yhoshü na nüngtem nung ayongba asayamong nung Nagaland aser Manipur na nungi ajak agi asayar telok 63-i shilem agitsü renema lir.
Tan asayamong nung shilem agir teloktemji Kohima nungi telok 49, Phek nungi 2, Dimapur nungi 6, Peren nungi 3, Tuensang nungi 1 aser Manipur nungi telok 2 aliba osang jangjaogo.
Ano külen, tan asayamong tetenzükba asaya nung defending champions, Barack FC, Peren teloki goal 6-0 agi Boyz United FC, Chiechama telok madak takok ngua asayaogo.
Tanü asaya nung Salu Kulim-i asaya tenzüker minute 10 buba aser 66 buba na nung par Barack telok asoshi goal 2 tashi agüja kanga junga shilem agi.
Nzauhutbo Nbung, Nyithung Magh, Aloumei Panmei aser Kekrusato Angami nungeria asaya tenzüker minute 15, 50, 61 aser 64 buba nung goal 4 agüja par Barack telok nem takokbaji bener arutsü.
September 17 nü asaya yamai alitsü:
1st Match (9:30 AM): Phezhu Boys Club Jotsoma vs Yhome FC Kohima
2nd Match (11:00 AM): 10th NAP (IR) XI vs ICFAI University FC Dimapur
3rd match (12:30 PM): Sechii-Zubza Youth Org. Vs Naga Boys Club (Ist batch).
4th Match (2:00 PM): Billy Graham FC Kohima vs Country Boys FC