Vikheho-i Asukika nung High School ki semzüktsü

Dimapur, November 5 (TYO) : Asukika nung tang tasen asüba High School ki November 05, 2016 nü Minister for Roads & Bridges, Y. Vikheho Swu tongti tesemdanger süa semzüktsüogo. Iba sentong nung Pughoboto ADC Avelu Ruho tetushi tejaoker liasü.
School ki semzükba sentong nung o jembidang tongti tesemdangeri, nüburtem, tesayurtem aser balakata kaketshirtemi iba ki kanga junga anepalua ayutsü aser takok tashi iba ki nüngdakba ajak ataloka amshiang, ta ashi.
Pai, asenok tebilemba melenshia tangar dang nungi tajungba asütsü merangtsüla aser süngdong atemba nung temulung kanga agütsütsüla kechiba süra süngdong atemba ajanga lipoküm merükdaktsüba dang masü saka tarutsü nung tajangzük tulu angutsü. Iba den külemi shiruru metsüa organic inyakyim nung temulung agütsütsüla, ta tesem nung aliba nüburtem ayongzük.
Tetushi tejaoker, Avelu Ruho-i, tesüiba mapang anguba konang dak nendaker dang melii tang aser tarutsü putu atema longjemer bendanga agüja inyaktsüla, ta ajungshi.
Lai, nenok tsüngda telemsa madokdaktsütsü merangang, ta shisem.
Sentong nung Asukika tesem nung Joint Council, Mendenbuba, Khuwoto Swu aser 1st class contractor Vihoto Shohe nati tarurtem pela agizükba o jembi. KBC Associate Pastor Youth, Jona Swu-i ken ka aten aser Pastor, GBC, Rev. C.S. Kiheto-i sentong tenzüka sarasadem. GHS Asukika nung AHM, Nagaholi Yeptho-i anküp tepela o jembi aser sentong tatem küma TBC pastor-i sarasadem. Iba sentong EBRC Pughobot, Coordinator, Vihoto Sheqi-i ketdang asü.