Vikheho-i Multi-purpose Indoor Stadium cum Badminton championship lapoktsüogo

Dimapur, August 25 (TYO): Nagaland Road & Bridges Minister, Y. Vikheho Swu-i Peren district kübok Jalukie jila nung Multi-purpose Indoor Stadium lapoktsüba den külemi, 40 buba Yonex Sunrise Nagaland Inter-District & State Open Badminton Champoinship tanü, Brehostibar nü tenzüktsüogo.
“Jalukie nung Multi-purpose stadium tentettsüsa Nagaland sorkar kübok Youth Resources & Sports (YR&S) department-i takok ngua inyakba atema pelaba metetdaktsür. Asen nüburtemi lokti ajangzüktsü ki o jen memeimba ajanga aiben takoksa angur. Anungji, Jalukie nüburtemi iba saisapongtsü ki o jen meima anepalutsü ajungshir,” ta tongti tesemdanger, Vikheho-i metetdaktsü.
“India’er tetsür badminton asayar, PV Sindhu-i bendanga agüja asayaba ajanga lai India linük nem konang tulu bener arutsüogo,” ta shia, asayartemi tazüokba nung alitsü aser saisapongtsü jakla yimya tajung benshia takoker kaka akümtsü tayongzükba olen ka Nagaland Badminton Association (NBA) nung Tir menden abensang, Vikheho-i ashi.
Ano külen, minister-sangi nüngshilung ka sayatsüba den külemi, All India Mixed Doubles Runners Up 2016 jenjang ajangzüker, Imlirenla Jamir aser Joseph Sumi na nem National Level Award agüja liasü.
Tan asayamong nung Nagaland Police telok aser Nagaland kübok tentetba district 9 nungi asayar 111 tashi toktepba shilem agitsü tenzüka lir.