Village council temi candidate pusemba aitsür: ACAUT

Dimapur, November 09 (TYO): 2018 elections nung 24 Angetyongpang A/C kübok Village Council pezü- Chapka, Yaongyimty Old, Yaongyimty New aser Phansang temi MLA aser Animal Husbandry & Veterinary Services Parliamentary Secretary, S. Chuba Longkumer yaritsü aser ano Kelingmen yimtsüngi National Highways Minister, Nuklutoshi-i yaritsü ta sangdongbaji democracy anema lir aser ozüngi memelaba inyakyim ka lir, ta Media Cell, ACAUT Nagaland sangdong ka nung metetdaktsü.
Yimtsüng 5 yimsüsürtemi iba ama mapa inyakba aitsür aser parnoki sangdongba osang jagi 2018 elections nung parnoki pusemba candidate tem asoshi ‘polling booths’ makbangtsü ta asüba tebilemba sayur. Iba inyakyim ya NBCC-i ayongzükba “Clean Election Campaign” anema dang masü saka “One Man One Vote” tangatetba anema lir aser ozüngi memelar, ta ACAUT Nagaland-i ashi.
Naga nungertemi election dak sendakba mapa timi inyaka sorkar tajung ka tentettsü aginüba mapang ka, yimtsüng 5-i iba ama telemtetba agibaji tesempatsüka aser ajaki aitsütsüla. Tangatetba shitak alir ajaki ‘village council sangdongtem’ inyakyim ya aitsütsüla kechiyong iba ajanga asenok tejakleni maoer. Ozüng kübok temerenshi mangudang village council temi ibala sangdong meyipa agitsü ayongzüker, ta ACAUT-isa metetdaktsü.
Ano külen, DMC area nung vote tenüngtem ajema kümdaktsüba anema District Congress Committee (DCC)-i district administration aser ketdangsertem aitsüba ya nüngdak mali aser tejashitsüka lir.
2004 nung vote agütsürtem tenüng 1,15, 395 aliba nungi 2016 nung 52,083 ajema akümtsüsa mapa inyak süra, district administration aser Chief Electoral Officer nem tenüngsang agütsütsüla,
September 18, 2016 nü ACAUT Nagaland-i Nagaland nung bogus voters lakh 4 lir ta sangoktsü. September 27, 2016 nü Hotel Japfu nung NGOs aser political party tem den senden ka amendang, CEO Nagaland, Sanjay Kumar, IAS-ia Nagaland nung vote agütsür tenüng lakh 11.20 aliba nungi lakh 4 bo bogus ta metetdaktsü. Iba osang ajanga ACAUT-i jembia aruba onük jangjashitsüogo. Dimapur nung tanga district nung permanent address agüja aliba Naga nungertem lir aser parnoki Dimapur nunga tenüng züluoker. Iba denji ozüng alema arua alir bendanger lakh aika tenüng enoksema lir, ta ACUAT-isa ashi.
Bendanger aika electoral roll nung tenüng züluokba ajanga tarutsü nung timtem adoktsü ta angateta NTC-i iba onük reprangshimtsü atema Co-ordination Committee ka tentet. Iba nung State Election Commission nungi osangtsüsang agitepa mapa inyaka arur. Anungji, district administration aser CEO aitsütsü melena, parnok nem tenüngsang agütsütsü tim.
Maneni, Nagaland state State E-roll nungi bogus tenüng lakh 4 agientsü atema ECI-i Nagaland nung Intensive E-roll Revision inyaktsü ajungmesor. Iba mapa ya 2003 nungi meinyakdang lir aser Summary Revision exercise agiba yabo meputeper, ta ACAUT-isa metetdaktsü.