Vinesh o Sakshi nati Olympics nung shilem agitsü jenjang angur

Istanbul, May 07 (Agencies): India’er tetsür melangteper ana – Vinesh Phogat aser Sakshi Malik nati Brazil kübok Rio de Janeiro nung taküm August ita asayatsü ayongba 2016 Rio Olympics nung shilem agitsü jenjang tanü, Honibar nü ajangzükogo.
Vinesh o Sakshi nati tang Turkey kübok Istanbul nung tagidak 2 buba Olympic Games World Qualifying Tournament final nung shilem agitsü jenjang ngua Rio Olympics nung shilem agitsü jenjangji angu.
Vinesh-i temang touzük seret 48 taret aser Sakshi-i seret 58 taret shilem final-i ia Olympics nung shilem agitsü jenjang tan mezüngsüa angu saka tenati National Trials nung takok angu nung dang India tenüng nung Olympics nung toktepa shilem agitsü jenjang angutsü.
Vinesh-i Turkey tsür, Evin Demirhan semifinal nung tsükdaktsüba sülen Polan tsür, Iwona Nina Matkowska den final asayatsü jenjang angu aser Sakshi-ia China tsür, Lan Zhang madak semifinal asaya koka, Russia tsür, Valeria Koblova Zholobova den final asayatsü jenjang ajangzük.
Vinesh o Sakshi na jakdang Yogeshwar Dutt, Narsingh Yadav, Sandeep Tomar aser Hardeep Singh nunger India’er tebur melangtepertemi Rio Olympics nung shilem agitsü jenjang ngua lir.