Vinod Khanna asüba olulu nung Meghalaya BJP puri akhüm tetushi agütsü

Shillong, April 09 (Agencies): Actor Vinod Khanna March 31 nü ‘dehydrate’ asüba ajanga temang kanga mejungi küma HN Reliance Foundation & Research Centre, Mumbai, Girgaum, nung temang anepalutsü asoshi anioka liasü.
Mozüki ‘medical bulletin’ Deobarnü adokba ajanga ashiba agi, pa tang tajungba lir, saka pa temang kanga mejungi aliba mapang tangokba noksa social media ajanga prokshiba sülen pa asüba olulu adoka liasü.
Iba dak sendakba nung Meghalaya nung Bharatiya Janata Party (BJP) puri mapa talila ka inyak aser ibaji Honibarnü party senden metenzükdang, party general secretary David Kharsati-i ayonga minute ana ola madoki asür Vinod nem akhüm tetushi agütsüba liasü.
Iba tatalokba sülen gondha ishika tsüngda nung iba osang social media balala ajanga prokshia liasü. BJP nung züngsem kari pa asüba osang television nung angazükba sülen kuli tejangja mebushii iba osang dak amang, ta party ajanga tatsüka lir külen osang jangjashitsü.
Party ajanga maneni iba tatalokba asoshi tatok meshia liasü aser actor ya tang tajungba lir ta metetdaktsü.
Vinod Khanna ya Punjab Gurdaspur district nungi Lok Sabha nung taoba mapang BJP züngsem ka liasü. Anogo ishika jakdang nungi pa mozüki nung aliba noksa social media balala ajanga prokshidar.
Arishi küm 70 tain actor ya noksa nung kanga paklapaklar adoka lir aser pa temang temelenshi ngua ajak aoksatepa liasü. Noksa nung pa mozüki süoshi semer par kinunger den tangoka lir. Iba kasa noksa ajanga pa asüba olulu prokshia liasü. Par kinungertemi ashiba agi, “pa mapang shitak nung temang anepalua tang tajungba lir.”
“Doctortemi pa yakta kidangi yoktsü asoshi inyakdar. Mozüki nung pa kanga junga anepaluba ngua ozü kibongi kanga pelar, aji dang masü nüburtemi osang balala ajanga onok nungita yariba ngua kanga pelar,” ta kinungertemi osang ka ajanga metetdaktsü.
Vinod Khanna April 2 nü sayaba film ‘Ek Thi Rani Aisi Bhi’ nung shilem agiba angutsü.