Vinod Kumar Duggal Mizoram Angh kümogo

Aizawl, November 15 (Agencies) : Manipur Angh Vinod Kumar Duggal ano Mizoram nunga Angh mapa repa abentsü atema shimogo aser iba mapa atema taoba Hokolbarnü tenangzükba agiogo.
Iba tenangzükba sentong nung Gauhati High Court atema Aizawl Permanent Bench nung tang teinyakdak judge, Justice L.S. Jamir-i state nung chief minister mapa khen atema benloka alisang R Lalzirliana, kilonsertem aser tongtibang nisungtem aika lia Aizawl Raj Bhavan nung Duggal nem Angh mapa atema tenangzükba ketdangsüa agidaktsü.
Tanü Aizawl tonga arusang, Duggal-i Mizoram Angh ita ka inyaker lia taoba Bodhbarnü anendaktsüsang Kamla Beniwal melener.
IAS officer nungi anisüngzüker alisang Duggal-i Mizoram nung 1973 küm tom nung 1976 tashi Additional District Magistrate aser District Magistrate mapa inyaka liasü. Iba sülen pai ano union home secretary inyak aser December 31, 2013 nung Manipur state nung Angh asütsü shima liasü.