VIP sobaliba agientsü jembir saka tongti tesemdanger ama shilem agi

Dimapur, Aami (June) 6 (TYO): PDA sorkari kümtetli chief minister Neiphiu Rio-i PDA-i aniba NDPP/BJP sorkari VIP sobaliba ajak agientsü aser PDA sorkar nungbo Tongti Tesemdanger sobaliba ya malitsü ta osang sangoktsü.
Nübortemi PDA sorkari nangzükbatem pela agizük saka sorkar ketdangsüa arudang parnoki nangzükba ama meinyak aser tang tesüsabuba atalokbaji Aami (June) 5, 2018 nü Kohima nung Livestock Program ka nung Chief Minister-i Tongti Tesemdanger ka ama shilem agiba lir, ta Press Bureau, Naga People’s Front-i metetdaktsü.
PDA sorkari parnok party mapa inyakertem aser kinungertem ozüng alema mashimashi shimba aser inyaksangshi tamajung ka tenzüka yutsüba atema tangatetertemi ola adoker. Nagaland Law Students’ Federation-ia PDA sorkar dang Secretary, Joint secretary aser Commissioner menden nung nisungtem shimokba anema shidi ka züluogo.
PDA sorkari party mapa inyakertem nem sorkar mapa nung menden tajungtem agütsüba ajanga kaketshirtem kanga tezüdangdaktsüogo aser iba ajanga tarutsü nung timtem aika ajurutsü. Tang PDA sorkari inyakyim tasen tenzüka yutsüba ajanga tarutsü nung kaketshirtemi NPSC mesüra UPSC tatidangtem agütsüba sülen mapa angutsü melena, ozüng alema mapa angutsü merangteptsü, ta NPF-isa metetdaktsü.
Temelenshi arudar ta nangzükba tu iba ya asü ta rata bilemer. Nübortemi temelenshi kanga aginüa liasü saka PDA sorkari tim masüba mapa inyakba ajanga nübortem jashidaktsür aser sorkar dak temulung alemba samaogo.
Election nung toktepba takok angurtem ajemzüka ayu saka party mapa inyakertembo Cabinet aser Minister of State jenjang nung shimba ajanga Parliamentary Procedures ajanga shimba MLA tem tetezü aser akhüm mali kümdaktsüogo, ta NPF-i ashi.
Nagaland Governor Acharya-i ita trok tsüngda Naga yimten latettsü ta sangokja lir saka PDA sorkari kümteter ita pezü süiogo saka Naga yimten tebilemtsü atema kecha meinyak lir, ta parnokisa shisem.
Tawa NNPGs troki yimten olemtep nung madentsü ta amokmerenba ajanga Naga yimten tebilemtsü asoshi tetsükdaktsü ka bentsür arua lir. Sorkari iba onük atema süoki ia meinyakra aser tanga teloktem ajak yimten olemtep sabangi anir marura “Final Naga Solution” ji mongutettsü aser Naga nunger ajaki anogo tamajungtem ajurutsü, ta NPF-isa metetdaktsü.