VIP temi Khristmas mapang state mesemdangtsüla : Mizoram sorkar

New Delhi, Dec. 04 (Agencies): Khristan tamangertem timba ser aliba state – Mizoram sorkari VIPs, tongtibang nisungtem aser tongti ketdangsertem dang December 14 nungi January 8 tsüngda ‘official visit’ marutsü mepishia metetdaktsüogo.
Khristmas aser Küm Tasen benjungmung nüngtem nung parnoki iba temepishiba agütsü.
Mizoram state sorkar tenüng nung Chief Secretary-i tawa tu Government of India kübok secretary ajak; state aser Union territory ajak nung chief secretary tem; state governor ajak indang ADC; Supreme Court & high courts (state ajak nung) registrar; state/UT ajak nung secretary (protocol); secretary, Lok Sabha; secretary, Scheduled Castes/Scheduled Tribes Commission; Secretary, Election Commission of India; secretary, Other Backward Classes Commission; secretary, Niti Aayog; aser secretary, UPSC tem dangi iba shidi yok.
Shidi nung Mizoram chief secretary-i ashiba agi, December 14 aser January 8 tsüngda VIP tem official visit ajak thinentsüla, kechiyong sorkari iba mapang parnok ain memesütettsü.
“Tesüiba mapang ama, taküma Mizoram nung Khristmas aser Küm Tasen benjungtem amungtsü, anungji VIPs, tongtibang nisungtem aser tongti ketdangser ajaki December 14, 2015 nungi January 8, 2016 tsüngda Mizoram semdangtsü sentong kar lira thinentsü mepishir, kechiyong state sorkari parnok ain memesütettsü” ta Mizoram sorkari shidi nung shia lir.
Mizoram nung Khristmas benjung kanga longsolongbena amunger aser parnoki anogo asemnü – December 24 nungi 26 tashi benjung amunger.
December 24 nikongtsütsü Khristmas jeli sentong tenzüker aser benjung anogo (December 25) nung parnoki tenla kidang adenshia Yisu asoba sentong agir. Iba sülen December 26 nü Mizo nungeri lokti chiyungtepba benjung ayongzüka agir aser iba nung lisopur kintem dang masü saka tanga kintem ajak jaoka benjungteper.
Khristmas benjung tembangba sülen parnoki Küm Tasen pela agizükba sentong balala ayongzüka amunger.